এনচিচিত তৃতীয় লিংগৰ লোকৰ অন্তর্ভুক্তিৰ নির্দেশ কেৰালা হাইক’ৰ্টৰ

এক ঐতিহাসিক ৰায়দানত কেৰালা উচ্চ ন্যায়ালয়ে ট্রেন্স জেণ্ডাৰ বা তৃতীয় লিংগৰ মহিলাক নেচনেল কেডেট ক’পছত (এনচিচি)ত অন্তর্ভুক্ত কৰাৰ নির্দেশ দিছে৷ ন্যায়াধীশ অণু শিৱৰমণে এগৰাকী ট্রেন্স মহিলাৰ আবেদনৰ শুনানি গ্রহণ কৰি এই ঐতিহাসিক ৰায়দান কৰিছে৷ ১৯৪৮ চনৰ নেচনেল কেডেট ক’পছ এক্টৰ এক বিশেষ ধাৰাক প্রত্যাহ্বান জনাইছিল ট্রেন্স মহিলাগৰাকীয়ে৷ এই ধাৰা অনুসৰি এন চি চিত ট্রেন্স জেণ্ডাৰ লোকৰ অন্তর্ভুক্তিত নিষেধাজ্ঞা আৰোপ কৰা হৈছিল৷

কেৰালা উচ্চ ন্যায়ালয়ে ট্রেন্স জেণ্ডাৰ লোকৰ (সুৰক্ষা আৰু অধিকাৰ) আইন ২০১৯ৰ অধীনত এন চি চিত তৃতীয় লিংগৰ ব্যক্তিৰ অন্তর্ভুক্তিত বাধা থাকিব নালাগে বুলি ঘোষণা কৰিছে৷ অর্থাৎ তৃতীয় লিংগৰ ব্যক্তিৰ অধিকাৰ আৰু সুৰক্ষাক গুৰুত্ব প্রদান কৰিয়েই এন চি চিত তেওঁলোকৰ অন্তর্ভুক্তি প্রয়োজন বুলি অভিহিত কৰিছে ন্যায়ালয়ে৷