কটনৰ জাননীকলৈ মুখ্যমন্ত্ৰী হিমন্ত বিশ্ব শৰ্মাৰ হস্তক্ষেপঃ কোনো কাৰণতে তৃতীয়পক্ষক দিয়া নহয় বিশ্ববিদ্যালয় চৌহদ

বহিৰাগতক ভাড়াত দিব কটন বিশ্ববিদ্যালয়! বিশ্ববিদ্যালয়ৰ ৰাজহ সংগ্ৰহত ব্যৱহাৰ হ’ব বিশ্ববিদ্যালয় চৌহদ। বিশ্ববিদ্যালয় চৌহদ ভাড়াত দিবলৈ ৬ জনীয়া কমিটি গঠন ৷ ৬ জনীয়া কমিটিয়ে নিৰ্ধাৰণ কৰিব কোনটো স্থান ভাড়াত দিব বিশ্ববিদ্যালয়ে ৷ কটন বিশ্ববিদ্যালয় চৌহদ ভাড়া প্ৰদানৰ সিদ্ধান্ত গ্ৰহণৰ পিছতে সৰব ৰাজ্যৰ প্ৰতিটো ৰাজনৈতিক, অৰাজনৈতিক দল সংগঠন ৷ বিশ্ববিদ্যালয়খনৰ এনে সিদ্ধান্তৰ বিৰুদ্ধে প্ৰতিবাদ সাব্যস্ত কটন বিশ্ববিদ্যালয় ছাত্ৰ সমাজৰ ৷ দেশৰ অগ্ৰণী শিক্ষা প্ৰতিষ্ঠান কটন বিশ্ববিদ্যালয়ক পৈত্ৰিক সম্পত্তিৰূপে ব্যৱহাৰৰ অভিযোগ ছাত্ৰ সমাজৰ ৷ যাৰ বিৰুদ্ধে কঠোৰ কটন বিশ্ববিদ্যালয়ৰ ছাত্ৰ সমাজ, অভিভাৱক তথা ছাত্ৰ একতা সভা ৷

বিশ্ববিদ্যালয় চৌহদ ভাড়াত প্ৰদান কৰি ৰাজহ সংগ্ৰহৰ সিদ্ধান্ত হঠকাৰী আৰু স্বেচ্ছাচাৰী আখ্যা ছাত্ৰ সমাজৰ৷ এনে সিদ্ধান্ত কোনোকালে মানি নলয় বুলি সকীয়াই দিছে বিশ্ববিদ্যালয় কৰ্তৃপক্ষক ৷ দেহত শেষ বিন্দু তেজ থকালৈ এক ইঞ্চি মাটিও এৰি নিদিয়ে বুলি দাবী কৰে কটনিয়ানে ৷ কটন বিশ্ববিদ্যালয়ৰ ছাত্ৰ সমাজৰ সমান্তৰালকৈ প্ৰতিক্ৰিয়া প্ৰকাশ সদৌ অসম ছাত্ৰ সন্থা মুখ্য উপদেষ্টা সমুজ্বল কুমাৰ ভট্টাচাৰ্য্য আৰু সভাপতি উৎপল শৰ্মাৰ ৷ “ছাত্ৰ সমাজক অন্ধকাৰত ৰাখি “এদেও দুদেও কৰি লোটা নিয়াৰ চেও” ধৰিছে চৰকাৰে ৷ দক্ষিণ পূৱ এচিয়াৰ উচ্চ শিক্ষাৰ হাৱ স্থাপন কৰাৰ সপোন দেখুওৱা মুখ্যমন্ত্ৰী হিমন্ত বিশ্ব শৰ্মাই এতিয়া বিক্ৰী কৰিব বিচাৰিছে ৰাজ্যৰ অগ্ৰণী শিক্ষা প্ৰতিষ্ঠানখনক ৷ ৰাজ্যৰ আৰ্থিক দুৰাৱস্থাৰ এয়া অন্যতম ছবি”, বুলি দাবী আছুৰ সভাপতি উৎপল শৰ্মাৰ ৷

ছাত্ৰ সংগঠনৰ এনে প্ৰতিক্ৰিয়াৰ পিছতে নিজৰ স্থিতি স্পষ্ট কৰিলে কটন বিশ্ববিদ্যালয়ৰ পঞ্জীয়ক অৰিন্দম গাৰ্গে ৷ শিক্ষাৰ্থীৰ সুবিধাৰ্থে বিশ্ববিদ্যালয় চৌহদত দিব ভাড়া ৷ হোটেল, জেৰক্স দোকানৰ স্থান নিৰ্ণয় কৰিব বাবে গঠন কৰিছিল ৬ জনীয়া কমিটি ৷ বিশ্ববিদ্যালয় চৌহদৰ ভূমি বিক্ৰী অথবা লীজত প্ৰদান কৰাৰ কোনো কথা নাই ৷ এনে ভূমি বিক্ৰীৰ প্ৰসংগ মাথোন অপব্যাখ্যা বুলি দাবী পঞ্জীয়কগৰাকীৰ ৷ বিশ্ববিদ্যালয়ৰ পঞ্জীয়কে কৰা এনে মন্তব্যক উভতি ধৰিছে ছাত্ৰ একতা সভাই ৷ যদি ভূমি প্ৰদানৰ প্ৰসংগই নাই তেন্তে মাষ্টাৰ প্লেনৰ প্ৰসংগ কিয় আহিল ৷ একেদৰে সংবাদ মাধ্যমত বাতৰি পৰিবেশনৰ পিছত কিয় ৱেবছাইটৰৰ পৰা আঁতৰ হল জাননী ৷ তাকলৈ প্ৰশ্ন ছাত্ৰ একতা সভাৰ সভাপতি হিমাংশু দাসৰ ৷ সেয়ে এতিয়া বিশ্ববিদ্যালয় ছাত্ৰ একতা সভাৰ বিশ্ববিদ্যালয় কৰ্তৃপক্ষক সকীয়নি যদি প্ৰকাশ পোৱা জাননী বাতিল নহয় তেন্তে কঠোৰ প্ৰতিবাদৰ মুখামুখি হ’ব বিশ্ববিদ্যালয় কৰ্তৃপক্ষ ৷ সেয়ে সময় থাকোতে জাননী বাতিল কৰাৰ হুংকাৰ ছাত্ৰ একতা সভাৰ ৷ ইমানে নহয় বিশ্ববিদ্যালয়ৰ ভূমিত SBI শাখা স্থাপন কৰিব বিচৰা বিষয়টো ছাত্ৰ সমাজৰ পৰা লুকুৱাৰ অভিযোগ ছাত্ৰ একতা সভা ৷ সেয়ে এতিয়া ছাত্ৰ শক্তিৰ এনে হুংকাৰ সকীয়নিৰ পিছত বিশ্ববিদ্যালয় কৰ্তৃপক্ষই কি সিদ্ধান্ত লয় সেয়া হ’ব লক্ষণীয় ৷