নগাঁও আৰু ননৈ আৰক্ষীয়ে পাঠৰি কাটনি গাঁৱত নকল সোণৰ বিৰূদ্ধে অভিযান চলাই গাঁত খান্দি মাটিৰ তলৰ পৰা উদ্ধাৰ কৰিবলৈ সক্ষম হৈছে নকল সোণৰ নাও আৰু যীশু খ্ৰীষ্টৰ মূৰ্তি । নকল সোণৰ ব্যৱসায় কৰা চক্ৰটোৰ এটা সদস্যক আৰক্ষীয়ে গ্ৰেপ্তাৰ কৰিবলৈ সক্ষম হৈছে । গ্ৰেপ্তাৰ কৰা সদস্যটো আটাউৰ ৰহমানৰ পুত্ৰ মুক্লেচুৰ ৰহমান বুলি জানিব পৰা গৈছে । প্ৰাপ্ত বাতৰি মতে ৰাজ্যত বিগত সময়ত ভয়াৱহভাৱে বৃদ্ধি পাইছে নকল সোণৰ ব্যৱসায় কৰা চক্ৰৰ প্ৰৱঞ্চনা । ইতিধ্যে বহু লোক এই চক্ৰটোৰ জালত পৰি প্ৰৱঞ্চনাৰ বলি হ’ব লগা হৈছে । ধৃত মুক্লেচুৰ ৰহমানে লক্ষিমপুৰৰ পৰা নকল সোণৰ নাও মূৰ্তি আনি বিক্ৰী কৰি বহুলোকক প্ৰৱঞ্চনাৰ জালত পেলায় । ৰবিবাৰে নিশা নগাঁও আৰক্ষীয়ে ননৈ আৰক্ষীৰ সহযোগত এক গোপন খবৰৰ ভিত্তিত অভিযান চলাই । নগাঁও আৰক্ষীয়ে এই চক্ৰটোৰ মূল সদস্যটোৰ সন্ধানত অভিযান অব্যাহত ৰাখিছে ।
ঋতু পৰ্ণ শৰ্মা,নগাঁও