শীতৰ আগমনৰ লগে লগে জ্বৰ–চৰ্দি–কাহ হৈছে নেকি? আৰম্ভণিতে ঔষধ নহয়, ব্যৱহাৰ কৰক এই ঘৰুৱা উপায়

ঋতু পৰিৱৰ্তনৰ এই সময় আমাৰ শৰীৰৰ বাবে মাৰাত্মক ক্ষতিকাৰক! জ্বৰ–চৰ্দি–কাহ আদিয়ে আমাৰ শৰীৰক ব্যতিব্যস্ত কৰি তোলে। শৰীৰ ক্লান্ত, ভোক নলগা, কাম কৰাৰ শক্তি নাইকীয়া হয়! এনে অৱস্থাত চিকিৎসকৰ কাষ চাপিলে আপোনাক দিব এণ্টিবায়টিক! কিন্তু চিকিৎসকক দেখুওৱাৰ পূৰ্বে আপুনি কেতবোৰ ঘৰুৱা উপায় অৱলম্বন কৰিব পাৰে।

নিমখ পানী – বুকুত কফ জমা হ’লে সেয়া দূৰ কৰাৰ বাবে দিনে দুই–তিনিবাৰ গৰম পানীত নিমখ দি গাৰ্গল কৰক। আৰাম পাব। নিমখে শ্বাসযন্ত্ৰৰ পৰা কফ দূৰ কৰাত সহায় কৰে।

গৰম পানীৰ ভাপ – গৰম পানীত মেন্থল মিহলাই লওক। এইবাৰ মূৰত এখন টাৱেল লৈ দীঘলীয়াকৈ গৰম পানীৰ পানীৰ ভাপ লওক। দিনে দুবাৰ অন্তত ১০ মিনিটৰ বাবে কৰক। বুকুত জমা হোৱা কফ সহজে ওলাই আহিব।

নেমু আৰু মৌ – নেমু পানীত ১ চাহ চামুচ মৌ মিহলাই খাওক। মৌৱে শ্বাসযন্ত্ৰৰ বেক্টেৰিয়া ধ্বংস কৰে, বুকুৰ পৰা কফ দূৰ কৰি ডিঙি পৰিষ্কাৰ কৰে।

হালধি – হালধিত আছে কাৰকুমিন যিয়ে বুকুৰ পৰা কফ, শ্লেষ্মা দূৰ কৰে বুকুৰ বেদনা হ্ৰাস কৰে। ইয়াৰ এণ্টি ইনফ্লেমেটৰী উপাদানে ডিঙিৰ বিষ, বুকুৰ যন্ত্ৰণা দূৰ কৰে। এগিলাছ কুহমীয়া গৰম পানীত এচিকুট হালধি গুৰি মিহলাই প্ৰতিদিনে কুলিকুলি কৰক। আৰাম পাব। ইয়াৰ উপৰি এগিলাছ গাখীৰত আধা চাহ চামুচ হালধি গুৰি মিহলাই উতলাওক। ২ চাহ চামুচ মৌ আৰু সামান্য জালুকৰ গুৰি মিহলাই এই মিশ্ৰণটো ২–৩ বাৰ খাওক। উপকাৰ পাব।

পিঁয়াজ – সম পৰিমাণৰ পিঁয়াজৰ ৰস, নেমুৰ ৰস, মৌ আৰু পানী একেলগে মিহলাই গৰম কৰক। এই মিশ্ৰণটো অলপ ঠাণ্ডা হ’লে দিনত ৩–৪ বাৰ খাওক। ইয়াৰ উপৰি কেঁচা পিঁয়াজো চোবাই খাব পাৰে। চৰ্দি–কাহ নাইকীয়া হ’ব!