মাজ আকাশত কো-পাইলটৰ আক্ৰমণ, আহত হৈও ১৭৪ যাত্ৰীৰ জীৱন ৰক্ষা ভাৰতীয় কেপ্টেইন স্মিত মাচ্ছাৰে

দুবাইৰ পৰা ইজৰাইল অভিমুখী Flydubaiৰ FZ1073 বিমানত মাজ আকাশতে সৃষ্টি হয় ভয়ংকৰ পৰিস্থিতি। ৩০ ছেপ্টেম্বৰত উৰা মৰা বিমানখনত কো-পাইলটে কেপ্টেইন স্মিত মাচ্ছাৰৰ ওপৰত আক্ৰমণ কৰাৰ পিছত বিমানখন হঠাতে তীব্ৰভাৱে উচ্চতা হেৰুৱাবলৈ ধৰে।
আক্ৰমণত গুৰুতৰভাৱে আহত হোৱাৰ পাছতো কেপ্টেইন মাচ্ছাৰে ককপিটৰ দুৱাৰ খুলিবলৈ সক্ষম হয়। ইয়াৰ পিছতে যাত্ৰী আৰু বিমানকৰ্মীসকলে ককপিটত প্ৰৱেশ কৰি আক্ৰমণকাৰীক বশ কৰে। বিমানখনত থকা দুজন অতিৰিক্ত পাইলটেও পৰিস্থিতি নিয়ন্ত্ৰণত সহায় কৰে।
বিমানখনে অৱশেষত সৌদি আৰৱৰ টাবুক বিমানবন্দৰত জৰুৰী অৱতৰণ কৰে। FZ1073ত মুঠ ১৭৪জন লোক আছিল বুলি একাধিক প্ৰতিবেদনত প্ৰকাশ পাইছে।
ঘটনাটোৰ সঠিক উদ্দেশ্য আৰু আক্ৰমণৰ পৰিস্থিতি এতিয়াও তদন্তাধীন। ইজৰাইল, সৌদি আৰৱ আৰু ইউএইৰ কৰ্তৃপক্ষই ঘটনাটোৰ তদন্ত অব্যাহত ৰাখিছে।
গুৰুতৰভাৱে আহত অৱস্থাতো ককপিটৰ দুৱাৰ খুলি যাত্ৰী আৰু কৰ্মচাৰীসকলক হস্তক্ষেপৰ সুযোগ দিয়াটো কেপ্টেইন স্মিত মাচ্ছাৰৰ ভূমিকাৰ এক গুৰুত্বপূৰ্ণ অংশ হিচাপে প্ৰতিবেদনসমূহত উল্লেখ কৰা হৈছে। বৰ্তমান তেওঁ চিকিৎসাধীন বুলি জানিব পৰা গৈছে।