Site icon Guwahati Times

ধৰ্ষণৰ অডিঅ‘ ছ’চিয়েল মিডিয়াত ভাইৰেল কৰি আটক ধৰ্ষণকাৰী

হোজাই জিলাৰ লংকাৰ লস্কৰ পথাৰত এগৰাকী নাবালিকাৰ ধৰ্ষণৰ লগত জড়িত থকাৰ অভিযাগত হোজাই জিলা আৰক্ষীয়ে মঙলবাৰে এজন যুৱকক আটক কৰে ৷ ভুক্তভোগী কিশোৰীগৰাকীৰ পৰিয়ালে প্ৰায় এসপ্তাহ ধৰি ধৰ্ষণৰ এই ঘটনাক গাপ দি ৰখাৰ পাছত হোজাই জিলা আৰক্ষী আৰু চাইল্ড লাইনৰ তৎপৰতাত পোহৰলৈ আহে সমগ্ৰ ঘটনা ।

হোজাই জিলা আৰক্ষীয়ে এটা অডিঅ’ ক্লিপৰ ভিত্তিত অভিযান অব্যাহত ৰাখি এই ধৰ্ষণ কাণ্ডৰ অভিযুক্তক আটক কৰে ৷ জানিব পৰা অনুসৰি, অঞ্চলটোৰ একাংশ লোকে নাবালিকাগৰাকীৰ পৰিয়ালক ভয়-ভাবুকি আৰু ধনৰ টোপ দি এই ঘটনা গাপ দিয়াৰ চেষ্টা কৰিছিল ৷ যাৰ বাবে ভুক্তভোগী পৰিয়ালটোৱে এসপ্তাহে ১৫ বছৰীয়া কিশোৰীগৰাকীৰ ধৰ্ষণৰ ঘটনাটো গাপ দি ৰাখিবলৈ বাধ্য হৈছিল ৷

হোজাই জিলাৰ আৰক্ষী অধীক্ষক বৰুণ পুৰকায়স্থ, উপ-আৰক্ষী অধীক্ষক ৰৌজি তালুকদাৰ আৰু লংকাৰ আৰক্ষী বিষয়া দুৰ্গা কিংকৰ শৰ্মাৰ তৎপৰতাত অৱশেষত পোহৰলৈ আহে এই চাঞ্চল্যকৰ ঘটনা ৷ আৰক্ষীয়ে আটক কৰা যুৱকজন লস্কৰ পথাৰৰ নাচিৰ উদ্দিন বুলি জানিব পৰা হৈছে ৷ ইতিমধ্যে লংকা আৰক্ষীয়ে ভাৰতীয় দণ্ডবিধি আইনৰ 376 (3) আৰু RW POCSO আইনৰ অধীনত নাচিৰ উদ্দিনক গ্ৰেপ্তাৰ কৰি জেললৈ প্ৰেৰণ কৰিছে ৷

নাচিৰ উদ্দিনে প্ৰায় ১০ দিন পূৰ্বে লংকাৰ দক্ষিণ লস্কৰ পথাৰৰ এটি দৰিদ্ৰ পৰিয়ালৰ কিশোৰীগৰাকীক ঘৰত কোনো নথকাৰ সুযোগ লৈ বিভিন্ন ভয় ভাবুকিৰে ধৰ্ষণ কৰিছিল ৷ তাৰ পিছতে নাচিৰ উদ্দিনে এই সমগ্ৰ ঘটনাৰ অডিঅ’ ৰেকৰ্ডিং ছ’চিয়েল মিডিয়াত ভাইৰেল কৰে ৷ আনহাতে এই ঘটনাক গাপ দিবলৈ গাঁওখনৰে কেইবাজনো ব্যক্তিয়ে ভুক্তভোগী পৰিয়ালটোক ভয়-ভাবুকি দিয়াৰ লগতে ধনৰ টোপ দি ঘটনাটোক গাপ দিবলৈ চেষ্টা কৰিছিল । অৱশেষত ম’বাইল যোগে ভাইৰেল হোৱা তথ্যৰ ভিত্তিত আৰক্ষীয়ে অভিযান চলাই কিশোৰীগৰাকীক উদ্ধাৰ কৰে ৷ সম্প্ৰতি চাইল্ড লাইনে কিশোৰীগৰাকীৰ স্বাস্থ্য পৰীক্ষা কৰি শিশু সুৰক্ষা গৃহলৈ প্ৰেৰণ কৰিছে ৷

Exit mobile version