টকা নহলে চাকৰি নাই.. এসময়ৰ এই পৰম্পৰাক তলা লগালে বিজেপি নেতৃত্বাধীন অসমৰ মুখ্যমন্ত্ৰী হিমন্ত বিশ্ব শৰ্মা ডাঙৰীয়াই | চৰকাৰী চাকৰিৰ ক্ষেত্ৰত চৰকাৰখনৰ এক লাখ নিযুক্তিৰ দিশে অগ্ৰসৰ | কঠোৰ পৰিশ্ৰম আৰু কঠোৰ অনুশীলনৰ ফলত হাজাৰ হাজাৰ যুৱক-যুৱতিয়ে লাভ কৰিবলৈ সক্ষম হৈছে একোটাকৈ চৰকাৰী চাকৰি |
সময় তেতিয়া দিনৰ ১১ টা বাজিছিল | ওদালগুৰিৰ নোনাইপাৰা চাহ বাগিচাৰ দুটাকৈ পৰিয়ালৰ দুজন যুৱকৰ পিতৃ-মাতৃ নিয়োজিত হৈ প্ৰখৰ ৰ’দ বাগানৰ চাহপাত চিঙা কামত | সেইসময়তে ঘোষণা কৰা হৈছিল অসম চৰকাৰৰ বন বিভাগৰ নিযুক্তি পৰীক্ষাৰ ফলাফল | নিযুক্তিৰ ফলাফলত উজ্বলি উঠিছিল নোনাইপাৰাৰ দুই যুৱক আভিনিয়ুছ লাক্ৰা আৰু কৃষ্ণা চাওৰা | বন বিভাগৰ কনিষ্টবলৰ পদত তেওঁলোকৰ নিযুক্তি ফলাফল গম পায় আনন্দত আত্মহাৰা হৈ পৰিছিল বাগানত কাম কৰা দুই পিতৃ-মাতৃয়ে | দিনযোৰা কাম কৰি ২৩২ টকা হাজিৰাৰে পৰিয়াল পোহপাল দিয়া বাগিছা অঞ্চলৰ এই পৰিয়ালটোয়ে নিজৰ সন্তানৰ পঢ়াৰ ক্ষেত্ৰত কেতিয়াও অসুবিধাৰ সন্মুখীন হবলৈ দিয়া নাছিল | যি সময়ত এচাম যুৱক-যুৱতিয়ে ফেচবুক, হোৱাটচ’প,ৰীলছত ব্যস্ত হৈ থকা দেখিবলৈ পোৱা যায়, সেইসময়ত এই দুই যুৱকে ৰাতিপূৱা ৪ বজাতে দৌৰিবলৈ যায় | নিজৰ সপোন পূৰণ কৰিবলৈ কৰিছিল কঠোৰ অনুশীলন | তেওঁলোকৰ এই সাফল্যত এতিয়া গৌৰৱান্বিত পিতৃ-মাতৃৰ লগতে নোনাইপাৰা চাহ বাগিচাৰ সকলো লোক | বাগিচাখনৰ পৰা এইবাৰেই প্ৰথমবাৰ চৰকাৰী চাকৰি লাভ কৰিবলৈ সক্ষম হৈছে বুলি পৰিয়ালৰ লোকৰ লগতে স্থানীয় লোকসকলে জানিবলৈ দিয়ে |