বৰপেটাৰ এগৰাকী শিশু অধিকাৰ কৰ্মীৰ অভিযোগৰ ভিত্তিত সোমবাৰে আৰক্ষীয়ে বাল্যবিবাহৰ সৈতে জড়িত থকাৰ অভিযোগত এজন অভিযুক্তক গ্ৰেপ্তাৰ কৰি জেল হাজোতলৈ প্ৰেৰণ কৰে ৷ আটকাধীন লোকজন বৰসুহা গাঁৱৰ চফিক মিঞা বুলি জানিব পৰা হৈছে ৷
বৰপেটাৰ শিশু অধিকাৰ কৰ্মী ৰফিকুল ইছলামে চফিক মিঞাই এগৰাকী কিশোৰীক ধৰ্ষণ আৰু গৰ্ভৱতী কৰাৰ পিচত বিবাহ কৰাৰ অভিযোগেৰে বৰপেটা থানাত এজাহাৰ দাখিল কৰিছিল ৷ ৰফিকুল ইছলামৰ অভিযোগৰ ভিত্তিত আৰক্ষীয়ে চফিক মিঞাক গ্ৰেপ্তাৰ কৰাৰ পিচত আদালতত হাজিৰ কৰে ৷ আদালতে অভিযুক্তজনৰ শুনানী গ্ৰহণ কৰি জেল হাজোতলৈ প্ৰেৰণ কৰে ৷
বৰসুহা গাঁৱৰ ১৫ বছৰীয়া কিশোৰীগৰাকীক একাংশ মাতব্বৰ আৰু কাজীয়ে বিবাহত বহাৰ বাবে বাধ্য কৰাৰ অভিযোগ তুলি এজাহাৰ দাখিল কৰিছিল শিশু অধিকাৰ কৰ্মীগৰাকীয়ে ৷ ইপিনে আৰক্ষীয়ে চফিক মিঞাক গ্ৰেপ্তাৰ কৰে যদিও বাল্যবিবাহৰ সৈতে জড়িত মাতব্বৰ আৰু কাজীগৰাকী এতিয়াও মুকলি আকাশৰ তলতে থকা বুলিও অভিযোগ উঠিছে ৷
