শীতকালত বহুতৰে ভৰিৰ গোৰোহা ফাটে৷ এই সমস্যা হ’লে ভৰি বিষায় আৰু ভৰিৰ সৌন্দৰ্যও হানি হয়৷ শীতকালত ভৰিৰ তলৰ অংশ আটাইতকৈ বেছি শুষ্ক অৱস্থাত থাকে৷ সেয়ে ভৰিৰ যতন লোৱাটো আৱশ্যকীয় হৈ পৰে৷ গোৰোহা ফাটিলে ঘৰুৱা উপায়েৰে ইয়াৰ পৰা উপশম পাব পৰা যায়৷ উল্লেখ কৰা হ’ল গোৰোহা ফটা সমস্যাৰ পৰা উপশম লাভ কৰাৰ কেইটামান সহজ উপায়৷
১) এচামুচ নিমখ, আধাকাপ নেমুৰ ৰস, দুচামুচ গ্লিচাৰিন, দুচামুচ গোলাপজল, পৰিমাণ অনুসৰি গৰম পানী আৰু পিউমিছ ষ্টোন যোগাৰ কৰি লওঁক৷
২) এইবাৰ এটা ডাঙৰ বাচনত সহ্য কৰিব পৰা গৰম পানী লৈ তাত নিমখ, দহ টোপাল নেমুৰ ৰস, এচামুচ গ্লিচাৰিন আৰু এচামুচ গোলাপজল মিহলাই লওক৷
৩) এইবাৰ পানীখিনিত পোন্ধৰ মিনিট সময় ভৰি দুখন তিয়াই ৰাখক৷ ইয়াৰ পাছত পিউমিছ ষ্টোনেৰে ভৰিৰ গোৰোহা দুটাত লাহে লাহে কেইমিনিটমান সময় ঘঁহক৷ এইখিনি কাম হ’লে ঠাণ্ডা পানীৰে ভৰি দুখন ধুই লওক৷
৪) এইবাৰ এচামুচ গ্লিচাৰিন, গোলাপজল আৰু দুই বা তিনি টোপাল নেমুৰ ৰস মিহলাই সেই মিশ্ৰণ ওৰেনিশা দুয়ো ভৰিত লগাই ৰাখক৷
এই মিশ্ৰণখিনি এঠাৰ দৰে, সেয়ে আপুনি কটনৰ মোজা পিন্ধিব পাৰে৷ পুৱা কুহুমীয়া পানীৰে ভৰি দুখন ধুই লোচন লগাওঁক৷ যদি আপোনাৰ ভৰি বহু বেছি ফাটি থাকে তেন্তে নেমুৰ ৰস ব্যৱহাৰ নকৰিব৷
