দেহৰ ক্ৰমবদ্ধৰ্মান ওজন হ্ৰাস কৰিবলৈ বহুতে বিভিন্ন উপায় অৱলম্বন কৰে, তাৰ ভিতৰত খোজ কঢ়াটো অন্যতম৷ নিজকে সুস্থ আৰু ফিট কৰি ৰাখিবলৈ খোজ কঢ়াৰ অভ্যাস অন্যতম উপায়৷ বিশেষকৈ খোজ কাঢ়িলে পেট আৰু কঁকালৰ চৰ্বি কমে৷ সেয়ে পুৱা আৰু নিশা খাদ্য গ্ৰহণৰ পাছত চিকিৎসকে কিছুসময় খোজ কাঢ়িবলৈ পৰামৰ্শ আগবঢ়ায়৷ কিন্তু এইখিনিতে প্ৰশ্নৰ উদয় হয় যে পেটৰ স্বাভাৱিক অৱস্থা ঘূৰাই পাবলৈ একোজন লোকে দিনে কিমান খোজ কঢ়া উচিত৷ উল্লেখ কৰা হ’ল এজন লোকে দৈনিক কিমান খোজ কঢ়াটো দৰকাৰ৷
পেট আৰু অতিৰিক্ত ওজন কমোৱাৰ ক্ষেত্ৰত উৎকৃষ্ট ফল পাবলৈ হ’লে স্বাভাৱিকভাৱে খোজ কঢ়াৰ সলনি দ্ৰুতগতিত খোজ কাঢ়ক৷ যিসকলে দৈনিক ৮ৰ পৰা ১০ ঘণ্টা সময় অফিচত বহি কাম কৰে তেওঁলোকৰ কৰ’নাৰী আৰ্টাৰি ডিজিজ, ট্ৰিপল ভেছেল ডিজিজ তথা হাৰ্টএটেকৰ আশংকা অধিক৷ শাৰীৰিক কাৰ্যকলাপ কমকৈ কৰিলে তেজত উচ্ছমাত্ৰাৰ কলেষ্টেৰল আৰু স্থূলতা বৃদ্ধি পোৱাৰ আশংকা থাকে৷ সেয়ে শৰীৰটো বেছিকৈ লৰচৰ কৰাত গুৰুত্ব দিয়া উচিত৷
কানাডাত চলোৱা এক সমীক্ষা মতে যিসকল মহিলাই চাৰে তিনিমাহ ধৰি দৈনিক এঘণ্টা খোজ কাঢ়ে তেওঁলোকে খাদ্যৰ সাল-সলনি নকৰাকৈ অন্ততঃ পেটৰ ২০ শতাংশ চৰ্বি কমাব পাৰে৷
খোজ কঢ়াটো আচলতে একধৰণৰ ব্যায়াম৷ যদি আপোনাৰ স্থূলতা আৰু হূদৰোগৰ সমস্যা নাই তেন্তে দৈনিক ১০ হাজাৰ কদম খোজ কঢ়াৰ অভ্যাস কৰিব পাৰে৷ তদুপৰি দৈনিক কঠোৰ শাৰীৰিক পৰিশ্ৰম কৰিলেও মাত্ৰ কেইসপ্তাহমানৰ ভিতৰতে দেহৰ অতিৰিক্ত ওজন কমে৷
জানি থোৱা ভাল যে খোজ কঢ়াৰ অভ্যাসে হজম আৰু বিপাক ক্ৰিয়াক স্বাভাৱিক কৰি ৰাখে৷ তদুপৰি খোজ কাঢ়িলে মানসিক স্বাস্থ্যৰো উন্নতি ঘটে৷ সেয়ে দৈনিক খোজ কঢ়াৰ অভ্যাস কৰক৷
