ডালিম ফলৰ মাজত অন্যতম সুস্বাদু আৰু উপকাৰী ফল, এই কথা সকলোৱেই জানে৷ কিন্তু এই ফল জানো সকলোৱে পৰ্যাপ্ত পৰিমাণে গ্ৰহণ কৰে৷ আপুনি হয়তো যুক্তি দিব পাৰে বজাৰত ডালিমৰ যি দাম কিনিবলৈ এশবাৰ ভাবিব লাগে৷ কিন্তু আমি বহুতেই অপ্ৰয়োজনীয়ভাৱে টকা খৰচ কৰো৷ স্বাস্থ্যৰ কাৰণে অত্যন্ত উপকাৰী ডালিম কিনিবলৈ পইচা নাই বুলি এনেয়ে অজুহাত দেখুৱাও৷ চিকিৎসক আৰু পুষ্টি বিশেষজ্ঞসকলে বিভিন্ন সময়ত ডালিমৰ উপকাৰিতাৰ বিষয়ে ব্যাখ্যা কৰি আহিছে৷ কেৱল শৰীৰৰ ভিতৰুৱা পুষ্টিৰ বাবেই যে ডালিম উপকাৰী এনে নহয়৷ ছালৰ বিভিন্ন সমস্যাও ডালিমে দূৰ কৰে৷ তেতিয়াহ’লে আমি এবাৰ চাওচোন আহক ছাল আৰু শৰীৰৰ কি কি উপকাৰ সাধে ডালিমে৷ ডালিমৰ ৰস পুষ্টিৰে ভৰপূৰ৷ ডালিমত ভিটামিন চি, ভিটামিন কে, ভিটামিন বি-৯, পটাছিয়াম ইত্যাদি থাকে৷ ডালিমে ৰক্তচাপ নিয়ন্ত্ৰণত ৰখাত সহায় কৰে৷ আথ্ৰাইটিছ ৰোগৰ উপশমতো ডালিমে অনন্য ভূমিকা পালন কৰে৷ ডালিমে হাড় মজবুত কৰে, হৃদৰোগৰ সম্ভাৱনা নাইকীয়া কৰে, ডায়েবেটিছ ৰোগ নিয়ন্ত্ৰণত ৰাখে, তেজত হিম’গ্লবিনৰ মাত্ৰা বঢ়ায়৷ ডালিমে এনিমিয়া আৰু ৰক্তজনিত সমস্যা দূৰ কৰে৷ মুঠতে মানৱ শৰীৰৰ আভ্যন্তৰীণ স্বাস্থ্য বজাই ৰখাত ডালিমে গুৰুত্বপূৰ্ণ ভূমিকা পালন কৰে৷ এইবাৰ আহো ছালৰ প্ৰসংগলৈ৷ ডালিমে কেনেদৰে ছালৰ উপকাৰ সাধন কৰে এই সন্দৰ্ভতো গৱেষণাত ওলাইছে বহুতো নতুন নতুন তথ্য৷ বিশেষজ্ঞৰ মতে ডালিমে ত্বক পৰিষ্কাৰ কৰাত বিশেষ সহায় কৰে৷ ডালিমত থকা ফ্লাভোনয়েড আৰু পিউনিক এছিডে ত্বকৰ গুৰিত পুষ্টি যোগায়, ছালৰ উজ্জ্বলতা বৃদ্ধি কৰে৷ বিশেষকৈ শিশু আৰু যুৱতী মহিলাৰ ছালৰ বাবে ডালিম অত্যন্ত উপকাৰী৷ পৰিষ্কাৰৰ লগে লগে ডালিমে ত্বক মসৃণ কৰে৷ ডালিমৰ পৰা প্ৰস্তুত কৰা স্ত্ৰাব ব্যৱহাৰ কৰিলে আপোনাৰ ছালত পৰিচ্ছন্নতাৰ লগতে কোমলতা আৰু মসৃণতা ফুটি উঠে৷ ডালিমক প্ৰাকৃতিক টনাৰ হিচাপেও ব্যৱহাৰ কৰা যায়৷ ডালিমৰ ৰসৰ লগত আপেল চাইদাৰ ভিনেগাৰ মিশ্ৰণ মুখত লগালে ভাল ফল পোৱা যায়৷ কিন্তু বেছিকৈ মুখত এই মিশ্ৰণ লগাব নালাগে৷ দৈনিক এটাকৈ ডালিম খোৱাত গুৰুত্ব দিলেই যথেষ্ট৷ সেয়েহে নিজকে ‘ফিট’ ৰাখিবৰ বাবে দৈনিক এটাকৈ ডালিম খাওক৷
