ফোনটো সক্ৰিয় কৰি ৰাখিবলৈ আটাইতকৈ জৰুৰী, ফোনটোক এটা নিৰ্দিষ্ট পেকত ৰিচাৰ্জ কৰি ৰখাটো৷ সময়মতে ৰিচাৰ্জ নকৰিলে ফোনটোৰ ইনকামিং বা আউটগ’য়িং সকলো পৰিসেৱা বন্ধ হৈ পৰে৷ কিন্তু কেতবোৰ উপায় আছে, যিবোৰ উপায়ৰ সহায়ত ৰিচাৰ্জ বা ডাটা পেক নাথাকিলেও আপুনি ৱাই-ফাই কিম্বা হটস্পটৰ সহায়ত ক’ল কৰিব পাৰিব৷ ইয়াৰ বাবে তলত উল্লেখ কৰা এপ্লিকেশ্বনসমূহ ব্যৱহাৰ কৰিব লাগিব–
◾হোৱাটছএপঃ হোৱাটছএপ ব্যৱহাৰ নকৰা লোক এতিয়া নাই বুলি ক’লেও অত্যুক্তি কৰা নহয়৷ আপুনি নিশ্চয় অৱগত যে হোৱাটছএপত ভইচকলৰ সুবিধা থাকে৷ জৰুৰী সময়ত আপুনি এই সুবিধা গ্ৰহণ কৰিব পাৰে৷ ইয়াৰ বাবে প্ৰথমে ছাট অপশ্বনলৈ যাওঁক৷ ইয়াৰ পাছত একেবাৰে ওপৰলৈ গৈ ক’ল বুটামত টেপ কৰক৷ এনে কৰাৰ লগে লগে আপুনি নিৰ্দিষ্ট নম্বৰৰ সৈতে যোগাযোগ কৰিবলৈ সক্ষম হ’ব৷ অৱশ্যে ইয়াৰ বাবে ৱাই-ফাই সংযোগ অথবা হটস্পটৰ সুবিধা থাকিব লাগিব৷
◾টেলিগ্ৰামঃ হোৱাটছএপৰ দৰে টেলিগ্ৰামো হৈছে এটা ইনষ্টেণ্ট মেছেজিং প্লেটফৰ্ম৷ ইয়াতো ভইচ আৰু ভিডিঅ’ ক’লৰ সুবিধা থাকে৷ এই এপৰ জৰিয়তে ক’ল কৰিবলৈ হ’লে প্ৰথমে টেলিগ্ৰাম অপেন কৰি লওক৷ ইয়াৰ পাছত যাৰ সৈতে কথা পাতিব বিচাৰিছে, তেওঁৰ ছাট উইণ্ডো খুলি লওক৷ ইয়াত থকা কল অপশ্বন টেপ কৰাৰ লগে লগে আপুনি কথা পাতিব বিচৰা ব্যক্তিজনৰ সৈতে যোগাযোগ সম্পন্ন হ’ব৷ মনত ৰাখিব যে, আপুনি কথা পাতিব খোজা ব্যক্তিজনো যাতে টেলিগ্ৰাম ব্যৱহাৰকাৰী হয়৷ টেলিগ্ৰামৰ জৰিয়তে ক’ল কৰাৰ ক্ষেত্ৰত ৱাই-ফাই আৰু হটস্পটৰ সহায় ল’ব পাৰে৷
◾ভাইবাৰঃ ভাইবাৰো আচলতে এটা মেছেজিং এপ৷ এই এপটো ব্যৱহাৰ কৰিব বিচাৰিলে প্ৰথমে ইয়াক প্লে’ষ্টৰৰ পৰা ডাউনলোড কৰি ল’ব লাগিব৷ এইটো এপৰ জৰিয়তেও ৰিচাৰ্জ অবিহনে ফোন ক’ল কৰাৰ সুবিধা পোৱা যায়৷ ইয়াৰ বাবে আপুনি যাৰ সৈতে ক’ল কৰিবলৈ বিচাৰিছে তেওঁৰ ছাট লিষ্ট খুলি অডিঅ’ অপশ্বনত টেপ কৰিব লাগিব৷ এই অপশ্বনত টেপ কৰা মাত্ৰেই আপোনাৰ ফোনৰ সৈতে নিৰ্দিষ্ট ফোন নম্বৰটোৰ সংযোগ ঘটিব৷ এইটো এপ অত্যন্ত নিৰাপদ আৰু ইয়াক ৱাই-ফাই বা হটস্পটৰ মাধ্যমেৰে নিৰ্বিঘ্নে ব্যৱহাৰ কৰিব পৰা যায়৷
