টাটা গ্ৰুপৰ প্ৰাক্তন অধ্যক্ষ ৰতন টাটা আৰু আমাৰ মাজত নাই। বুধবাৰে মুম্বাইৰ ব্ৰীজকেণ্ডি হস্পিতালত শেষ উশাহ নিশ্বাহ ত্যাগ কৰে উদ্যোগপতিগৰাকীয়ে। তেওঁ কেৱল এগৰাকী ব্যৱসায়িক টাইকুনেই নহয়, নিজৰ জনহিতকৰ কামৰ বাবেও তেওঁ জনাজাত আছিল।
বিগত কেইবছৰমানৰ পৰা, তেওঁ নৱ-প্ৰজন্মক উৎসাহিত কৰিবলৈ ষ্টাৰ্টআপত বিনিয়োগ কৰি আছিল। ৰাজকীয় সন্মানেৰে বিদায় দিয়া হ’ব উদ্যোগপতি ৰতন টাটাক।বৰ্তমানলৈ কোনো ব্যৱসায়ীয়ে এনেধৰণৰ সন্মান লাভ কৰা নাই। এতিয়া তেওঁৰ মৃত্যুৰ পিছত, আটাইতকৈ ডাঙৰ প্ৰশ্নটো হ’ল তেওঁৰ পিছত কোন হ’ব টাটা উত্তৰাধিকাৰী জানিবলৈ চেষ্টা কৰোঁ আহক-
টাটা গ্ৰুপৰ উত্তৰাধিকাৰী পৰিকল্পনা–
টাটা গোটৰ উত্তৰাধিকাৰী পৰিকল্পনাক লৈ দেশৰ সকলো জনসাধাৰণৰ মাজত যথেষ্ট কৌতূহল আছে। দেশৰ ১৪০ কোটি মানুহে জানিব বিচাৰে যে ইমান ডাঙৰ সাম্ৰাজ্যৰ নেতৃত্ব কোনে ল’ব?
টাটা গোটত উত্তৰাধিকাৰীৰ পৰিকল্পনা ভালদৰে প্ৰতিষ্ঠিত হৈছে। এন চন্দ্ৰশেখৰণে ২০১৭ চনৰ পৰা হোল্ডিং কোম্পানী টাটা চন্সৰ অধ্যক্ষ হিচাপে কাৰ্যনিৰ্বাহ কৰি আহিছে। পৰিয়ালৰ আন সদস্যসকলে ব্যৱসায়ৰ বিভিন্ন অংশত নেতৃত্ব দি আছে। ভৱিষ্যতে দলটোক নেতৃত্ব দিবলৈ বহুতো প্ৰাৰ্থী আছে।
নোয়েল টাটা: নোয়েল টাটা হৈছে ৰতন টাটাৰ সতীয়া ভাই, যি ৰতন টাটাৰ পিতৃৰ দ্বিতীয় পত্নীৰ সন্তান। এনে পৰিস্থিতিত, নোয়েল টাটা হৈছে ৰতন টাটাৰ বিশাল সাম্ৰাজ্য চম্ভালিব পৰা অন্যতম মুখ্য প্ৰতিযোগী। নোয়েল টাটাৰ তিনিটা সন্তান আছে – মায়া, নেভিল আৰু লিয়া টাটা, যি গোটটোৰ সম্ভাৱ্য উত্তৰাধিকাৰী হ’ব পাৰে।
মায়া টাটা: ৩৪ বছৰীয়া মায়া টাটাই, টাটা গ্ৰুপত নিৰন্তৰ আগবাঢ়ি আছে। বেইছ বিজনেছ স্কুল আৰু ৱাৰউইক বিশ্ববিদ্যালয়ৰ পৰা স্নাতক ডিগ্ৰী লাভ কৰাৰ পিছত, তেওঁ টাটা অপাৰচুনিটিজ ফাণ্ড আৰু টাটা ডিজিটেলত গুৰুত্বপূৰ্ণ পদত অধিষ্ঠিত হৈছে। বিশেষকৈ, তেওঁ টাটা নিউ এপ মুকলি কৰাত গুৰুত্বপূৰ্ণ ভূমিকা পালন কৰিছিল, তেওঁৰ কৌশলগত দক্ষতা আৰু দূৰদৰ্শিতা প্ৰদৰ্শন কৰিছিল।
নেভিল টাটা: ৩২ বছৰীয়া নেভিল টাটা সক্ৰিয়ভাৱে পাৰিবাৰিক ব্যৱসায়ত নিয়োজিত হৈ আছে। টয়োটা কিৰ্লোস্কাৰ গ্ৰুপৰ মানসী কিৰ্লোস্কাৰৰ সৈতে বিবাহপাশত আৱদ্ধ হোৱা নেভিলে ট্ৰেণ্ট লিমিটেডৰ অধীনৰ ষ্টাৰ বজাৰ নামৰ কোম্পানীটোৰ মুৰব্বী।
লিয়া টাটা: ৩৯ বছৰীয়া লিয়া টাটাই, টাটা গোটৰ আতিথ্য খণ্ডত নিজৰ চাপ এৰিছে। স্পেইনৰ আইই বিজনেছ স্কুলত শিক্ষা লাভ কৰা লিয়া টাটাই তাজ হোটেল ৰিজৰ্ট আৰু পেলেচত গুৰুত্বপূৰ্ণ পদত কাম কৰিছে।
বৰ্তমান, ইণ্ডিয়ান হোটেল কোম্পানীয়ে আতিথ্য উদ্যোগত গোটটোৰ উপস্থিতি চম্ভালি আছে।
৪০০ বিলিয়ন টাটা গ্ৰুপ
প্ৰতিবেদন অনুসৰি, আগষ্ট ২০২৪ লৈকে, টাটা গ্ৰুপৰ সকলো কোম্পানীৰ সম্মিলিত বজাৰ মূলধন হৈছে ৪০০ বিলিয়ন ডলাৰ বা প্ৰায় ৩৫ লাখ কোটি টকা।
বৰ্তমান, কোম্পানীটোৰ ২৯ টা কোম্পানী শ্বেয়াৰ বজাৰত তালিকাভুক্ত কৰা হৈছে। গোটটোৰ আটাইতকৈ ডাঙৰ কোম্পানীটো হৈছে টাটা কনসালটেন্সি।
৯ অক্টোবৰ ২০২৪ তাৰিখলৈকে কোম্পানীটোৰ বজাৰ মূলধন আছিল ১৫,৩৮,৫১৯.৩৬ কোটি টকা। টিচিএছ হৈছে বজাৰ মূলধনৰ ক্ষেত্ৰত দেশৰ দ্বিতীয় সৰ্ববৃহৎ আৰু দেশৰ সৰ্ববৃহৎ আইটি কোম্পানী। ৰতন টাটাৰ নেতৃত্বত টিচিএছে সৰ্বাধিক বৃদ্ধি দেখে আৰু ইনফোচিছ আৰু উইপ্ৰোৰ দৰে বৃহৎ আইটি কোম্পানীক অতিক্ৰম কৰি ১ নম্বৰ স্থান দখল কৰে।
