গুৰু শিষ্যৰ সম্পৰ্কৰ পৱিত্ৰতা ইতিহাসে ঢুকি নোপোৱা যুগৰে পৰা আমাৰ সমাজত প্ৰচলিত হৈ আহিছে ৷ সৌ সিদিনালৈ পথেৰে শিক্ষক এজন গৈ থকা দেখিলে ছাত্ৰ এজনে চাইকেলৰ পৰা নামি শিক্ষকক সন্মান জনোৱাৰ দৃশ্য আমাৰ সমাজত তেনেই সাধাৰণ আছিল ৷ শিক্ষক সকলেও এসাজ নাখাই হ’লেও শিষ্য সকলৰ জ্ঞানৰ চকু মুকলি কৰাৰ কামত যুগে-যুগে নিয়োজিত হৈ আহিছে ৷ পিছে এতিয়া সেই ৰামো নাই অযোধ্যাও নাই ৷
শিক্ষকতাৰ দৰে পৱিত্ৰ বৃত্তিত নিয়োজিত হৈ থাকিও এচাম অসাধু শিক্ষকে এই সন্মানীয় বৃত্তিত কালিমা সনাৰ ঘটনা যেন আমাৰ সমাজত লাহে লাহে সাধাৰণ হৈ পৰিছে ৷ শেহতীয়াকৈ এনে এক ঘটনাই সংঘটিত হ’ল ডিব্ৰুগড়ৰ টেঙাখাতত ৷ টেঙাখাত জাতীয় বিদ্যালয়ৰ এজন বিষয় শিক্ষক বৈকুণ্ঠ বৰুৱাই বিদ্যালয় খনতে অধ্যয়ন কৰি যোৱা এগৰাকী ছাত্ৰীৰ লগত প্ৰেমৰ সম্পৰ্ক গঢ়ি তোলে ৷
পিছত ১৬ বছৰীয়া ছাত্ৰী গৰাকীক পলুৱাই লৈ যোৱাৰে অভিযোগ উত্থাপিত হয় শিক্ষক জনৰ ওপৰত৷ এই কথা গম পাই পিছত ছাত্ৰী গৰাকীৰ পৰিয়ালৰ লোকে টেঙাখাত আৰক্ষী থানাত শিক্ষকজনৰ বিৰুদ্ধে এখন এজাহাৰ দাখিল কৰে ৷ পৰৱৰ্তী সময়ত বৃহস্পতিবাৰে শিক্ষক বৈকুণ্ঠ বৰুৱাক আৰক্ষীয়ে গ্ৰেপ্তাৰ কৰি Tengakhat P. S. Case no 110/2021 U/S 366 IPC গোচৰত জেললৈ প্ৰেৰণ কৰে ।
