এখন কেতিয়াও নেদেখা বিয়া। গুজৰাটৰ ২৪ বছৰীয়া ক্ষমা বিন্দুৱে নিজকেই পাতিব বিয়া। হয়, শুনিবলৈ আচৰিত যেন লাগিলেও গুজৰাটৰ বদোদৰাৰ এইগৰাকী যুৱতী নিজৰ লগতেই আৱদ্ধ হ’ব বিবাহপাশত।
এই ব্যতিক্ৰম বিয়াখনত সকলোখিনি ৰীতি-নীতি মানি চলা হ’ব, যেনে- ‘ফেৰা’, বিয়াৰ প্ৰতিজ্ঞাৰ পৰা আৰম্ভ কৰি গোৱাৰ হানিমুনলৈকে। এই বিয়াখনত নাথাকে দৰা বা বৰযাত্ৰী।
উল্লেখ্য যে, এইখনেই হ’ব ভাৰতৰ প্ৰথম একক বিবাহ। ক্ষমা বিন্দুৱে এই ক্ষেত্ৰত কয় যে, “ভাৰতত এনে কোনো বিবাহ হৈছে নেকি মই বিচাৰি চাইছিলোঁ, কিন্তু তেনেধৰণৰ কোনো বিবাহ সম্পন্ন হোৱা নাই। হয়তো ময়েই প্ৰথম যিয়ে এই পদক্ষেপ ল’বলৈ আগবাঢ়িছোঁ।”
ইফালে, টাইমছ অব ইণ্ডিয়াৰ এক প্ৰতিবেদন অনুসৰি ক্ষমাই কয় যে, ‘মই কেতিয়াও বিয়া হ’ব বিচৰা নাছিলো। কিন্তু মোৰ নিজকে কইনা হিচাপে চোৱাৰ ইচ্ছা আছিল। সেয়ে মই নিজৰ লগতেই বিয়া হ’বলৈ সিদ্ধান্ত লৈছোঁ।”
“আত্ম-বিবাহ হৈছে নিজৰ বাবে, ই এক থকাৰ প্ৰতিশ্ৰুতি আৰু নিজৰ প্ৰতি নিঃচৰ্ত প্ৰেম। ই লগতে আত্মগ্ৰহণৰ এক উদাহৰণো৷ মানুহে বিয়া তাক পাতে যাক তেওঁলোকে ভাল পায় আৰু মই নিজকে ভাল পাওঁ।”- বুলিও কয় ক্ষমাই।
তেওঁৰ এই সিদ্ধান্তক লৈ পৰিয়ালৰ প্ৰতিক্ৰিয়া কি বুলি প্ৰশ্ন কৰাত সাংবাদিকক তেওঁ কয় যে, পিতৃ-মাতৃয়ে তেওঁক বিয়াখন আগবঢ়াই নিয়াৰ বাবে আশীৰ্বাদ দিছে। গোত্ৰীৰ এটা মন্দিৰত অনুষ্ঠিত হ’বলগীয়া বিয়াৰ বাবে ক্ষমাই প্ৰস্তুত কৰিছে পাঁচটা ব্ৰত। বিয়াৰ পিছতে নিজকে দুসপ্তাহৰ হানিমুনত গোৱালৈ লৈ যোৱাৰো সিদ্ধান্ত লৈছে ক্ষমাই।
