হঠাৎ যেন সংকট নামি আহিল মহানগৰীৰ চিৰিয়াখানা পথৰ ‘যোগমায়া’ এপার্টমেণ্টৰ আৱাসীসকলৰ মাজলৈ৷ প্ৰতিমূহূর্ততে এক অজান ভয়ে যেন সকলোকে খেদি ফুৰে। উক্ত এপার্টমেণ্টৰে আৱাসী শংকৰী দে (৬২)ৰ নৃশংস হত্যাকাণ্ডৰ ঘটনা সাতমাহৰ পাছত পোহৰলৈ অহাৰ পাছতে তিনিমহলীয়া এপার্টমেণ্টটোৰ আৱাসীসকল আতংকিত হৈ পৰিছে।
উল্লেখ্য যে চান্দমাৰি আৰক্ষী থানাৰ অন্তৰ্গত চিৰিয়াখানা পথৰ চিত্ৰবন উপ-পথৰ গৃহ নম্বৰ ছয় অর্থাৎ যোগমায়া এনক্লেভৰ ‘বি-২’ ফ্লেটৰ আৱাসী আছিল প্রয়াত শংকৰী দে।
তাতেই সাতমাহৰ পূৰ্বে বোৱাৰীয়েক বন্দনা কলিতাই বন্ধুৰ সহযোগত তেওঁক নৃশংসভাৱে হত্যা কৰিছিল। বিগত সাতটা মাহে শংকৰী দে নিৰুদ্দেশ হৈ থকাত আন আৱাসীসকলে কোনো অস্বাভাৱিকতা অনুভৱ কৰা নাছিল।
এতিয়া উক্ত হত্যাকাণ্ডৰ কথা সদৰী হোৱাৰ পাছতে আৱাসীসকলক নানা ধৰণৰ দুশ্চিন্তাই গ্ৰাস কৰিছে। নিশা হ’লেই যেন কলিং বেল বাজি উঠা, দুৱাৰত কোনোবাই যেন টোকৰ মৰা আদি অনুভৱবোৰে সম্প্ৰতি তেওঁলোকক উজাগৰী নিশা কটাবলৈ বাধ্য কৰিছে।
যাৰ বাবে আৱাসীসকলে শংকৰী দেৰ আত্মাৰ শান্তিৰ বাবে পূজাৰ আয়োজন কৰাৰো প্ৰস্তুতি চলাইছে। কিয়নো সকলোৰে মনত শংকৰী দেৰ অতৃপ্ত আত্মাই যেন এপার্টমেণ্টটোৰ পৰা আঁতৰি নোযোৱাৰ ধাৰণাটো ক্ৰমাৎ গাঢ় হৈছে।
উল্লেখ্য যে কমাৰ্চ কলেজৰ সমীপৰ আণ্টি দোকানৰ সন্মুখৰ চিত্ৰবন নামৰ নিজান পথেৰে গৈ শেষৰ গৃহ নম্বৰ ছয়ৰ চৌহদতে সংঘটিত হৈছিল শংকৰী দেৰ নৃশংস হত্যাকাণ্ড।
চৌহদটোত দুটাকৈ এপার্টমেণ্ট আছে আৰু ইয়াৰ ‘যোগমায়া এনক্লেভ’ নামৰ এপার্টমেণ্টটোৰ তৃতীয় তথা ওপৰ মহলাৰ এটা ফ্লেটতে বাস কৰিছিল শংকৰী দেয়ে। যোগমায়া এনক্লেভত ছটাকৈ ফ্লেট আছে আৰু ইয়াৰে এটা ফ্লেট ছাত্ৰীৱাস হিচাপে ব্যৱহৃত হৈ আছে।
শংকৰী দেৰ ফ্লেটৰ দুৱাৰৰ মুখামুখীকৈ আন এটা ফ্লেটত এজন ব্যৱসায়ীৰ পৰিয়ালে বসবাস কৰে। অৰ্থাৎ প্ৰতিটো মহলাতে দুটাকৈ ফ্লেট আৰু ইয়াৰে দ্বিতীয় মহলাত থকা ছাত্ৰীৱাসত মাজে মাজে হঠাৎ দুৱাৰত টোকৰ আৰু কলিং বেল বাজি উঠে বুলি আৱাসীসকলে প্রতিবেশীৰ আগত ইতিমধ্যে সদৰী কৰিছে।
সমান্তৰালভাৱে এই ঘটনা পোহৰলৈ অহাৰ পাছতে সন্ধিয়াৰ পৰাই সমগ্ৰ চৌহদটো একে নির্জনতাই বিৰাজ কৰিবলৈ লৈছে। বিশেষ প্রয়োজন নহ’লে কোনো আৱাসীয়েই সন্ধিয়াৰ পাছত ফ্লেটৰ বাহিৰ নোহোৱা হৈছে।
যাৰ বাবে এতিয়া প্রতিবেশী লোকসকলৰ মাজতো এক অজান ভয়ে গ্ৰাস কৰিবলৈ আৰম্ভ কৰিছে। এপার্টমেণ্টটোৰ সমীপৰ ঠাইখিনিও যেন ক্ৰমে জয়াল হৈ পৰিছে। এই নৃশংস হত্যাকাণ্ড পোহৰলৈ অহাৰ পাছতে পৰিয়ালসমূহে ভয়-আতংকৰ মাজেৰে দিন অতিবাহিত কৰিছিল বুলি মন্তব্য কৰি নাম প্রকাশত অনিচ্ছুক এজন আৱাসীয়ে কয়, ‘যিটো ঘটনা সংঘটিত হৈছে শুনিলেই ভয় লাগে।
তাতে নিজৰ চৌহদতে যেতিয়া সংঘটিত হৈছে আমাৰ কি অৱস্থা হৈছে অনুধাৱন কৰক। সেয়ে আমি আৱাসীসকলে ভাবিছো শীঘ্ৰে এখন পূজা অনুষ্ঠিত কৰা, যাতে তেওঁৰ আত্মাই শান্তি লাভ কৰে।’ উল্লেখ্য যে ২০২২ৰ ২৬ জুলাইত বোৱাৰী বন্দনা আৰু তেওঁৰ সহপাঠী অৰূপ ডেকাই বিয়লি যোগমায়া এনক্লেভৰ বি-২ ফ্লেটত তথা শংকৰী দেৰ ফ্লেটত উপস্থিত হৈছিল আৰু প্ৰায় পাঁচ বজাত এখন ছোফাত বহি থকা অৱস্থাত বৃদ্ধাক মুখত গাৰুৰে সোপা দি হত্যা কৰিছিল।
গাৰুৰ সোপাত উশাহ-নিশাহ বন্ধ হৈ পৰা শংকৰী দেয়ে যেতিয়া ছটফটাই আছিল, তেতিয়া অৰূপে ভৰি দুখনত ধৰি সহযোগ কৰিছিল। তেওঁৰ মৃত্যুৰ পাছত মৃতদেহটো বাথৰূমলৈ লৈ যোৱা হৈছিল আৰু বাথৰূমৰ ভিতৰৰ মজিয়াত এখন বেলনা পাৰি তাত মূৰটো পাতি ৩৫০ টকাত ক্ৰয় কৰা এখন ‘দা’ৰে প্ৰহাৰ কৰিছিল।
এই প্ৰহাৰত মূৰটো শৰীৰৰ পৰা বিচ্ছিন্ন হোৱাৰ লগতে হাত দুখনো কাটি দেহৰ পৰা বিভক্ত কৰা হৈছিল। ইয়াৰ পাছতে ধনটি ডেকাই লৈ অহা পলিথিনত তিনিটা খণ্ডত বিভক্ত দেহটো বান্ধি ওপৰত কম্বলেৰে মেৰিয়াই দিয়া হৈছিল।
পাছদিন অর্থাৎ ১৮ আগষ্টৰ পুৱতি নিশা বাথৰূমৰ পৰা মৃতদেহটো ধনটিৰ বাহনত উঠোৱা হৈছিল আৰু মেঘালয়ৰ চেৰাপুঞ্জীৰ পথৰ দ’ খাৱৈত পেলাই দিয়া হৈছিল।
উল্লেখ্য যে একমাত্ৰ পুত্ৰ অমৰজ্যোতি দেৰ কৰ্ম-কাণ্ডত অতিষ্ঠ হৈয়ে নাৰেংগীৰ ‘অমৰাৱতী’ এপার্টমেণ্ট এৰি যোগমায়াত অকলশৰে বসবাস কৰি আহিছিল শংকৰীয়ে। দীর্ঘসময়ৰ কাৰণে নহ’লেও মাজে মাজে যোগমায়াত শংকৰীৰ সহযোগী আছিল একমাত্র পুত্ৰৰ বোৱাৰী বন্দনা।
শাহু-বোৱাৰীৰ মাজত গঢ় লৈ উঠা মধুৰ সম্পৰ্ক আৰু বিশ্বাস আৱাসীসকলেও প্রত্যক্ষ কৰিছিল। ২০২২ৰ আগষ্টৰ পৰা শংকৰী দেক আৱাসীসকলে প্রত্যক্ষ কৰা নাছিল যদিও বন্দনাক কেতিয়াবা কোঠালৈ অহা-যোৱা কৰা প্রত্যক্ষ কৰিছিল।
ভ্ৰমণ কৰি ভাল পোৱা শংকৰী দেয়ে কোনো স্থান ভ্ৰমণ কৰিবলৈ যোৱা বুলি ভাবিছিল যোগমায়াৰ আৱাসীসকলে; কিন্তু হঠাৎ অহা সেই দেশ জোঁকাৰি যোৱা খবৰটো তেওঁলোকৰ সপোনৰো অগোচৰ আছিল।
গাৰ নোম শিয়ৰি উঠা এই ঘটনা পোহৰলৈ অহাৰ পাছৰে পৰা এতিয়া আৱাসীসকলক অজান ভয়ে প্রতিমুহূর্ততে খেদি ফুৰিছে।
