শৰীৰ আৰু মন ভালে ৰাখিবলৈ পেট পৰিষ্কাৰ হৈ থকাটো জৰুৰী৷ আপুনি হয়তো ভাবিছে যে পেট পৰিষ্কাৰৰ সৈতে মনৰ কি সম্পৰ্ক থাকিব পাৰে? ধৰক আপোনাৰ পেট সঠিকভাৱে পৰিষ্কাৰ হৈ থকা নাই, তেতিয়া তাৰ প্ৰভাৱ পৰিব শৰীৰত৷ ইয়াৰ পাছত মনটো ভালে থাকিব পাৰেনে? তদুপৰি কোষ্ঠকাঠিন্যৰ সমস্যা থাকিলে মানসিক অৱস্থা সুস্থিৰ হৈ নাথাকে৷ এনে ক্ষেত্ৰত এই সমস্যাৰ পৰা এৰাই চলিবলৈ সতৰ্ক হোৱাটো প্ৰয়োজন৷ কাৰণ কোষ্ঠকাঠিন্যৰ সমস্যা ভাল লক্ষণ নহয়৷ এই সমস্যাই পৰৱৰ্তী সময়ত পাইলছ আৰু কেন্সাৰৰ দৰে গুৰুতৰ ৰোগৰ সৃষ্টি কৰে৷ অতিৰিক্ত ফাষ্টফুড, ৰেডমিট,অত্যধিক তেল আৰু মছলাযুক্ত খাদ্য বেছিকৈ খালে অথবা ফাইবাৰযুক্ত খাদ্য এৰাই চলিলে কোষ্ঠকাঠিন্যৰ সমস্যাই দেখা দিয়ে৷
কোষ্ঠকাঠিন্যৰ সমস্যা থাকিলে খাদ্য সহজে হজম নহয়৷ ফলত শৌচৰ সময়ত সমস্যাৰ সৃষ্টি হয়৷ লগতে পেটৰ বিষ, গেষ্ট্ৰিক, পেটফুলা আদিৰ সৃষ্টি হয়৷ তদুপৰি কেতিয়াবা কেতিয়াবা ভোক নলগা, শৰীৰ দুৰ্বল, বমিভাব আদি হয়৷ এনেকুৱা হ’লে ফাইবাৰযুক্ত খাদ্য প্ৰচুৰ পৰিমাণে খোৱা উচিত৷ কোষ্ঠকাঠিন্যৰ সমস্যা হ’লে কেইবিধমান খাদ্য ভুলতো খোৱা উচিত নহয়৷ উল্লেখ কৰা হ’ল এনে কেইবিধমান খাদ্য–
টেঙা দৈঃ টেঙা দৈ স্বাস্থ্যৰ পক্ষে যে অতি উপকাৰী সেয়া সকলোৱে জানে৷ দৈয়ে ৰুচি বঢ়োৱাত সহায় কৰে৷ কিন্তু টেঙা দৈ কোষ্ঠকাঠিন্য সমস্যাৰ এটা অন্যতম কাৰণ৷ কোষ্ঠকাঠিন্যৰ সমস্যাই দেখা দিলে ভুলতো দৈ নাখাব৷ ই লাগিলে মিঠাই হওক বা টেঙাই হওক৷ লগতে গাখীৰৰ পৰা তৈয়াৰ কৰা সকলো ধৰণৰ খাদ্য খোৱাৰ পৰা বিৰত থাকক৷ কিয়নো গাখীৰযুক্ত খাদ্যই বদহজমৰ সৃষ্টি কৰে৷
জিৰাঃ জিৰা এবিধ উপকাৰী মছলা৷ ই খাদ্যৰ সোৱাদ বৃদ্ধি কৰে৷ জিৰাই ভোক কমায় আৰু চৰ্বি গলোৱাত সহায় কৰে৷ গেষ্ট্ৰিকৰ সমস্যাও সমাধান কৰে জিৰাই৷ কিন্তু কোষ্ঠকাঠিন্য সমস্যাত ভুগিলে জিৰা খোৱাৰ পৰা বিৰত থাকক৷ জিৰাই এই সমস্যা অধিক বৃদ্ধি কৰে৷
কফিঃ মন সতেজ আৰু ক্লান্তি ভাব দূৰ কৰাত সহায় কৰে কফিয়ে৷ সেয়ে দীৰ্ঘ কৰ্মব্যস্ততাৰ মাজত বহুতেই কফি খায়৷ কিন্তু যদি আপোনাৰ কোষ্ঠকাঠিন্যৰ সমস্যা আছে তেন্তে কফিৰ পৰা আঁতৰি থাকক৷ কফিয়ে ডিহাইড্ৰেছনৰ সৃষ্টি কৰে৷
