এগৰাকী অসমীয়াই গৌৰৱান্বিত কৰিলে অসমৰ লগতে ভাৰতবাসীক ৷ এইগৰাকী অসমীয়া নাৰীৰ নাম চিৰদিনৰ বাবে খোদিত হ’ব বিশ্বৰ অন্যতম এখন প্ৰখ্যাত বিশ্ববিদ্যালয়ত ।বিশ্ববিদ্যালয়খনে এই কথা ঘোষণা কৰাৰ পাচতে উৎফুল্লিত হৈ পৰিছে অসমবাসী ৷
বিশ্বৰ এখন প্ৰখ্যাত বিশ্ববিদ্যালয় হ’ল ইউনিভাৰ্চিটি অব্ নিউ ছাউথ ৱেলচ্ ৷ অষ্ট্ৰেলিয়াৰ কেনছিংটনত (Kensington) অৱস্থিত বিশ্ববিদ্যালয়খন এখন সম্ভ্ৰান্ত বিশ্ববিদ্যালয় হিচাবে পৰিচিত ৷ স্নাতক নিয়োগ যোগ্যতাৰ ক্ষেত্ৰত বিশ্বৰ ভিতৰতে ২৭ সংখ্যক স্থানত আৰু অষ্ট্ৰেলিয়াৰ দ্বিতীয় স্থানত থকা বিশ্ববিদ্যালয়খনৰ ১৭ টা বিল্ডিং নতুনকৈ নামকৰণ কৰাৰ সিদ্ধান্ত লৈছে কৰ্তৃপক্ষই ৷
সেই অনুসৰি বিশ্ববিদ্যালয়খনৰ মহিলা পদাংক চিৰযুগমীয়া কৰাৰ উদ্দেশ্যে নিৰ্বাচিত কৰা হৈছে বিশ্বৰ বিভিন্ন স্থানৰ পৰা গৈ বিশ্ববিদ্যালয়খনত খোজ দিয়া কেইবাগৰাকীও মহিলাৰ নাম ৷ তাৰে এগৰাকী অসম সন্তান অন্নদা গোঁহাই ৷ অন্নদা গোঁহাইৰ নামত নামকৰণ কৰা হ’ব বিশ্ববিদ্যালয়খনৰ GO-6 প্ৰেক্ষাগৃহ ৷ অন্নদা গোঁহাই আছিল গুৱাহাটীৰ খাৰঘূলিৰ বাসিন্দা ৷
২০১১ৰ ১৯ ছেপ্তেম্বৰত ৮১ বছৰ বয়সত মৃত্যুবৰণ কৰা অন্নদা গোঁহায়ে অসম চৰকাৰৰ কৃষি বিভাগৰ অতিৰিক্ত সঞ্চালক হিচাবে সেৱা আগবঢ়াই ২০০৭ চনত অৱসৰ গ্ৰহণ কৰিছিল ৷ অষ্ট্ৰেলিয়াৰ প্ৰখ্যাত বিশ্ববিদ্যালয়খনে অন্নদা গোঁহাইৰ নাম চিৰযুগমীয়া কৰাৰ প্ৰয়াসৰ কাৰণ হ’ল যে তেওঁ ১৯৫৫ চনত বিশ্ববিদ্যালয়খনৰ আমন্ত্ৰণত এক বিশেষ দুবছৰীয়া খাদ্য প্ৰযুক্তি কাৰ্যসূচীত অংশগ্ৰহণ কৰিছিল ৷
১৯৫৯ত তেওঁ ইউনিভাৰ্চিটি অব্ নিউ ছাউথ ৱেলচৰ পৰাই স্নাতকোত্তৰ ডিগ্ৰী লাভ কৰিছিল ৷ বিশ্ববিদ্যালয়খনে প্ৰকাশ কৰা অনুসৰি এনে কেইগৰাকীমান নাৰীৰ নামেৰে বিশ্ববিদ্যালয়খনৰ বিভিন্ন বিল্ডিং আৰু অঞ্চল নতুনকৈ নামাকৰণৰ সিদ্ধান্ত লোৱা হৈছে, যিকেইগৰাকী মহীয়সী নাৰীৰ পদধূলা বিশ্ববিদ্যালয়খনৰ বাবে আশীৰ্বাদস্বৰূপ ৷
উল্লেখ্য যে, বিদেশৰ বিশ্ববিদ্যালয়েও নাম চিৰযুগমীয়া কৰিবলৈ বিচৰা অন্নদা গোঁহাই শিক্ষাবিদ মহেন্দ্ৰ নাথ গোহাঁইৰ সুযোগ্যা সন্তানৰ লগতে বিশিষ্ট চিন্তাবিদ ড° হীৰেন গোঁহাইৰ জ্যেষ্ঠ ভগ্নী ৷
