গীনিজ বুক অৱ ৱৰ্ল্ড ৰেকৰ্ডছত অসমৰ বিহু নাচক স্থান দিয়াৰ অৰ্থে অসম চৰকাৰৰ উদ্যোগত ১৪ এপ্ৰিলত হ’বলগীয়া বিহু নাচ প্ৰদৰ্শনত অংশগ্ৰহণ কৰিবলগীয়া কামৰূপ মহানগৰ জিলাৰ বিহুৱা-বিহুৱতীসকলে আজি বিয়লি শ্ৰীমন্ত শংকৰদেৱ কলাক্ষেত্ৰ প্ৰাঙ্গনত বিহু নাচ প্ৰদৰ্শন কৰে ৷
শ্ৰীমন্ত শংকৰদেৱ আন্তৰ্জাতিক প্ৰেক্ষাগৃহৰ সন্মুখৰ মুকলি স্থানত জিলাখনৰ আঠশ বিহুৱা-বিহুৱতীয়ে বিহু নাচত অংশগ্ৰহণ কৰে ৷ মন্ত্ৰী পীযুষ হাজৰীকা, সাংসদ কুইন ওজা, বিধায়ক ৰমেন্দ্ৰ নাৰায়ণ কলিতা, গুৱাহাটীৰ মেয়ৰ মৃগেন শৰণীয়া, কলাক্ষেত্ৰ সমাজৰ সচিব সুদৰ্শন ঠাকুৰ প্ৰমুখ্যে কেবাগৰাকী বিশিষ্ট ব্যক্তি আৰু শতাধিক ৰাইজে বিহু নাচ উপভোগ কৰে ৷
বিহু নাচৰ অন্তত মন্ত্ৰী হাজৰীকাই বিহুৱা-বিহুৱতী সকলক উদ্দেশ্যি কয়, ‘বিহুক বিশ্ব দৰবাৰত প্ৰতিষ্ঠা কৰাৰ লক্ষ্যৰে চলোৱা এই প্ৰচেষ্টা সফল কৰাৰ বাবে আপোনালোক সকলোৱে কষ্ট কৰি আছে ৷ অংশগ্ৰহণকাৰী এঘাৰ হেজাৰ বিহুৱা-বিহুৱতীক অংশগ্ৰহণৰ প্ৰমাণপত্ৰ দিয়া হ’ব বুলি মুখ্যমন্ত্ৰী ডাঙৰীয়াই ঘোষণা কৰিছে ৷
আপোনালোকে ভৱিষ্যত প্ৰজন্মৰ ওচৰত এই মহৎ প্ৰচেষ্টাত অংশগ্ৰহণৰ গৌৰৱ কৰিব পাৰিব ৷’ বিহু নাচৰ পূৰ্বে ‘সংগীত সত্ৰ’ৰ শিল্পীসকলে কৃষ্ণ বন্দনা নৃত্য পৰিবেশন কৰে ৷ জিলা উপায়ুক্ত পল্লৱ গোপাল ঝাৰ তত্বাবধানত আৰু অতিৰিক্ত উপায়ুক্ত কল্পনা ডেকাৰ তদাৰকত সাজু হৈছে বিহুৱা-বিহুৱতীসকল ৷ তেওঁলোকক প্ৰশিক্ষণ দিয়া মাষ্টাৰ প্ৰশিক্ষকৰ নেতৃত্বত আছে বিশিষ্ট শিল্পী ৰঞ্জিত গগৈ ৷
