NIA ৰ গোচৰত জামিন লাভ কৰিছে শিৱসাগৰ সমষ্টিৰ বিধায়ক তথা ৰাইজৰ দলৰ সভাপতি অখিল গগৈয়ে । দেশৰ উচ্চতম ন্যায়ালয়ে গগৈৰ স্থায়ী জামিন মঞ্জুৰ কৰিছে । CAA আন্দোলনৰ সময়তে তেওঁৰ বিৰুদ্ধে এই গোচৰ তৰা হৈছিল । পিছত নিয়াৰ আদালতে বিধায়কগৰাকীক এই গোচৰৰ পৰা মুক্তি দিছিল ।
কিন্তু বিগত মাহত পুনৰ গুৱাহাটী উচ্চ ন্যায়ালয়ত বিচাৰ আৰম্ভ কৰা হৈছিল তেওঁৰ বিৰুদ্ধে । ইয়াৰ পিছত অখিল গগৈয়ে উচ্চতম ন্যায়ালয়ৰ কাষ চাপে আৰু আজি জামিন মঞ্জুৰ হয় । “ভাৰত চৰকাৰ, ৰাজ্য চৰকাৰ আৰু নিয়াই (NIA) যিকোনো প্ৰকাৰে মোক আকৌ চক্ৰবেহুত ভৰাব বিচাৰিছিল, জেলত ভৰাব বিচাৰিছিল ৷ কিন্তু বিফল হ’ল ।”
জামিন লাভৰ খবৰ পাই আজি শিৱসাগৰত এইদৰে প্ৰতিক্ৰিয়া প্ৰকাশ কৰে বিধায়ক অখিল গগৈয়ে । তেওঁ আৰু কয়- “এতিয়াৰে পৰা অধিক শক্তিশালী ৰূপত বিৰোধীৰ ভূমিকাত অৱতীৰ্ণ হ’ব পাৰিম । মোৰ ভয় নাইকিয়া হ’ল ।
“মোক ফচাব নোৱাৰিব । এই সমস্যা শেষ হল ।” তেওঁ লগতে অসমবাসীৰ বাবে অধিক দৃঢ়তাৰে কাম কৰি যাব বুলি উল্লেখ কৰে । ইয়াৰ উপৰিও অখিল গগৈয়ে কেতিয়াও আপোচ কৰা নাছিল আগলৈয়ো নকৰে বুলি মত প্ৰকাশ কৰে ।
