ছৌদি আৰৱৰ অতি পৱিত্ৰ তীৰ্থস্থান মক্কা আৰু মদিনা দৰ্শন কৰি জীৱন ধন্য কৰিবলৈ পোৱাটো ইছলাম ধৰ্মাৱলম্বী প্ৰতিগৰাকী লোকৰ বাবে পৰম সৌভাগ্যৰ বিষয় বুলি গণ্য কৰা হয় । এই পৱিত্ৰ তীৰ্থস্থান দৰ্শন কৰিবলৈ প্ৰতিবছৰে বিশ্বৰ ভিন্ন প্ৰান্তৰ লাখ লাখ লোকেৰে ভৰি পৰে ছৌদি আৰৱ । ব্যতিক্ৰম নহয় অসমো । অসমৰ হজযাত্ৰীসকলে প্ৰতিবছৰে ভাগ লয় এই পৱিত্ৰ যাত্ৰাত ।
ক’ভিড মহামাৰীৰ বছৰকেইটাত হজ যাত্ৰা বন্ধ আছিল যদিও পুনৰ পৰিস্থিতি ঠিক হোৱাত বৰ্তমান হজ যাত্ৰা কৰিবলৈ আগবাঢ়িছে ইছলামধৰ্মী লোকসকল । কিন্তু এইবাৰ কিছু সাল-সলনি হ’ব হজ যাত্ৰাৰ নিয়ম- নীতি । চলিত বৰ্ষৰ ৪ জুনৰ পৰা আৰম্ভ হ’ব হজ যাত্ৰা । কিন্তু গুৱাহাটীৰ পৰা পোনে পোনে জেড্ডালৈ যোৱাৰ সলনি এইবাৰ দিল্লী বা মুম্বাইৰ পৰাহে চৌদি আৰৱলৈ যাব লাগিব হজ যাত্ৰীসকল ।
কিন্তু বহু যাত্ৰীয়ে এনেদৰে হজ যাত্ৰালৈ যোৱাত অসুবিধা সৃষ্টি হৈছে । এনে ব্যৱস্থাৰ বাবে যাত্ৰাৰ সময়সূচী দীঘলীয়া হোৱাৰ লগতে যাত্ৰীসকলো অসুবিধাত পৰিব পাৰে । কাৰণ বহু ক্ষেত্ৰত দেখা যায় সুপৰিকল্পিত ব্যৱস্থা নোহোৱাৰ বাবে বহু অসুবিধাত পৰে হজযাত্ৰীসকল । অন্যহাতেদ দিল্লী বা মুম্বাইত যাত্ৰীসকলে কিমান সময় অপেক্ষা কৰিব লাগিব সেয়াও নিশ্চিত নহয় ।
সেয়ে হজ সমিতিক পুনৰ বিষয়টো চিন্তা চৰ্চা আৰু আলোচনাৰ মাজেৰে গুৱাহাটীৰ পৰাই হজ যাত্ৰীসকলে যাতে পোনপটীয়াকৈ যাত্ৰা আৰম্ভ কৰিব পাৰে তাৰ বাবে সুবিধা কৰিবলৈ হজ যাত্ৰীসকলে আহ্বান জনাইছে ।
