ভাৰতীয় মহাকাশ গৱেষণা সংস্থাই বৃহস্পতিবাৰে জনায় যে মঙলবাৰে তৃতীয় কক্ষপথ পৰিবৰ্তন প্ৰক্ৰিয়া সফলতাৰে সমাপ্ত কৰি চন্দ্ৰযান-৩ য়ে চতুৰ্থ কক্ষপথ অতিক্ৰম কৰিছে।
পৃথিৱীৰ মাধ্যাকৰ্ষণীয় টান অতিক্ৰম কৰি চন্দ্ৰৰ পথলৈ যাবলৈ চন্দ্ৰযানে বহু শক্তি সঞ্চয় কৰিবলগীয়া হব। সেই কাম ই বৃত্তাকাৰ গতিৰ জৰিয়তে কৰি আছে। পাঁচবাৰকৈ কক্ষপথ সলনি কৰি পৃথিৱীৰ টান কাটি মাধ্যাকৰ্ষণ শক্তিৰ বাহিৰ ওলাই আহিব পাৰিব চন্দ্ৰযান।
ইছৰোৱে জনোৱা মতে, ২৫ জুলাইত দুপৰীয়া ২ বজাৰ পৰা ৩ বজাৰ ভিতৰত ইছৰোৰ মহাকাশযানখনে পঞ্চমবাৰৰ বাবে কক্ষপথ সলনি কৰিব। তাৰ পিছতে ই চন্দ্ৰৰ পিনে গতি কৰিব।
প্ৰতিটো ঢাপত যিদৰে ই কক্ষপথ সলনি কৰিছে, সেইদৰে ইয়াৰ গতিও বৃদ্ধি পাইছে। উৎক্ষেপণৰ পিছৰে পৰা সুকলমে আগবাঢ়ি আছে চন্দ্ৰযান-৩। অৱশ্যে ইছৰোৰ বিজ্ঞানীসকলে বাহনখনৰ গতিবিধিৰ ওপৰত তীক্ষ্ণ দৃষ্টি ৰাখিছে। পৰিকল্পনা অনুসৰি কাম আগবাঢ়িছে।
উল্লেখ্য যে সমগ্ৰ ভাৰতৰ আশা কঢ়িয়াই অন্ধ্ৰ প্ৰদেশৰ শ্ৰীহৰিকোটাৰ পৰা ভাৰতৰ চন্দ্ৰযান-৩য়ে যাত্ৰা আৰম্ভ কৰিছে। যদি এই অভিযান সফল হয় তেন্তে ৰাছিয়া, আমেৰিকা আৰু চীনৰ পাছত চন্দ্ৰত নিয়ন্ত্ৰিত অৱতৰণ সাধন কৰা চতুৰ্থখন দেশ হিচাপে পৰিগণিত হ’ব ভাৰত।
