মহানগৰীৰ গড়চুক অঞ্চলত এগৰাকী ১৬ বছৰীয়া কিশোৰীক পিতৃ-মাতৃৰ সন্মুখত নৃশংসভাৱে দলবদ্ধ ধৰ্ষণ আৰু নিৰ্যাতন চলোৱাৰ খবৰ পোৱাৰ লগে লগে দেওবাৰে পুনৰ গুৱাহাটীত গণধৰ্ষণৰ এক জঘন্য ঘটনা পোহৰলৈ আহিছে।
খবৰ অনুসৰি যোৱা ২ আগষ্টত সংঘটিত হৈছিল এই জঘন্য ঘটনা। চাৰিজনীয়া এটা দলে ১৬ বছৰীয়া কিশোৰীগৰাকীক পিতৃ-মাতৃৰ সন্মুখত ড্ৰাগছ সেৱন কৰাৰ পিছত পাল পাতি ধৰ্ষণ কৰে। এতিয়া ন্যায় বিচাৰি পৰিয়ালটোৱে এজাহাৰ দাখিল কৰিবলৈ আৰক্ষীৰ কাষ চাপিছে। গড়চুক আৰক্ষী থানাত যৌন অপৰাধৰ পৰা শিশু সুৰক্ষা (POCSO) আইনৰ অধীনত ২২৯/২৩ নম্বৰৰ গোচৰ ৰুজু কৰা হয়।
অভিযোগৰ ভিত্তিত গড়চুক আৰক্ষীয়ে তদন্ত আৰম্ভ কৰি তিনিজনক আটক কৰে। ইয়াৰে দুজনক ৰমেন বড়ো আৰু আৰেন বড়ো বুলি চিনাক্ত কৰা হৈছে, তৃতীয়জনৰ পৰিচয় এতিয়াও জানিব পৰা হোৱা নাই।
অৱশ্যে পোহৰলৈ আহিছে যে এই ভয়ানক আচৰণৰ মূল সন্দেহযুক্ত ব্যক্তিজন এতিয়াও পলাতক অৱস্থাত আছে। গুৱাহাটীৰ বিৰুবাৰী অঞ্চলত ভাড়াতীয়াকৈ বাস কৰা ধুবুৰী বাসিন্দা ফকিৰ বুলি জানিব পৰা গৈছে। চতুৰ্থজন সন্দেহযুক্ত লোকক গ্ৰেপ্তাৰ কৰাৰ প্ৰচেষ্টা চলোৱা হৈছে বুলি বিষয়াসকলে উল্লেখ কৰিছে।
