সমগ্ৰ তিনিচুকীয়া জিলাৰ লগতে ৰাজ্যবাসীৰ বাবে আছে এক সুখবৰ । তিনিচুকীয়ালৈ গৌৰৱ কঢ়িয়াই আনিছে আকাংক্ষা হাজৰিকাই । কিয়নো, ভাৰতৰ ছোৱালী হেণ্ডবল দললৈ নিৰ্বাচিত হৈছে তিনিচুকীয়াৰ আকাংক্ষা হাজৰিকা । ইতিমধ্যে ইন্দো-বাংলাদেশ আন্তৰ্জাতিক হেণ্ডবল চেম্পিয়নশ্বিপত অংশগ্ৰহণ কৰিলে আকাংক্ষাই । আকাংক্ষা হাজৰিকাৰ ঘৰ তিনিচুকীয়াৰ বাঘজান চাহ বাগিচাত । আকাংক্ষাই ভাৰতীয় ছোৱালী হেণ্ডবল দললৈ নিৰ্বাচিত হোৱাৰ পাছতে শনিবাৰে মতিৰাম কৈৰী কল্যাণ ন্যাসৰ তৰফৰ পৰা বাঘজান চাহ বাগিচাস্থিত নিজা বাসগৃহত সম্বৰ্ধনা জ্ঞাপন কৰে আকাংক্ষা হাজৰিকাক । সম্বৰ্ধনা অনুষ্ঠানত উপস্থিত থাকে সদৌ অসম কিষাণ সমাজৰ ৰাজ্যিক সভাপতি ৰাজেশ কিষাণ, অসম খাড়িয়া সমাজৰ জিলা সভাপতি ৰবীন খাড়িয়া, অসম চাহ জনগোষ্ঠী জাতীয় মহাসভা তিনিচুকীয়া জিলাৰ সহকাৰী সম্পাদক অনুৰাগ কৈৰী ।
