অসমত বাল্য বিবাহৰ বিৰুদ্ধে ৰাজ্য চৰকাৰে ধাৰাবাহিকভাৱে ব্যৱস্থা গ্ৰহণ কৰি আহিছে। অসমৰ মুখ্যমন্ত্ৰী ড০ হিমন্ত বিশ্ব শৰ্মাই পুনৰ বাল্য বিবাহ কৰা লোকসকলক সকীয়াইছে। মুখ্যমন্ত্ৰী শৰ্মাই দেওবাৰে কয় যে আগন্তুক ১০ দিনৰ ভিতৰত ৰাজ্যত বাল্যবিবাহৰ লগত জড়িত ৩০০০ লোকক গ্ৰেপ্তাৰ কৰা হ’ব। বিজেপি মহিলা মৰ্চাৰ দুদিনীয়া ৰাষ্ট্ৰীয় কাৰ্যনিৰ্বাহক সভাৰ সামৰণি অনুষ্ঠানত মুখ্যমন্ত্ৰী শৰ্মাই কৰ্মীসকলক সম্বোধন কৰাৰ পাছতে এই মন্তব্য কৰে।
মুখ্যমন্ত্ৰী শৰ্মাই কয় যে তেওঁ মাত্ৰ জি-২০ শীৰ্ষ সন্মিলনৰ সামৰণিৰ বাবে অপেক্ষা কৰি আছে, শীৰ্ষ সন্মিলন শেষ হোৱাৰ লগে লগে তেওঁ দ্বিতীয় ৰাউণ্ডৰ কাৰ্য্যসূচী আৰম্ভ কৰিব। তেওঁ কয় যে মাত্ৰ ছমাহ পূৰ্বে অসমত বাল্য বিবাহৰ বাবে ৫ হাজাৰ লোকক গ্ৰেপ্তাৰ কৰা হৈছিল। মুখ্যমন্ত্ৰীয়ে কয় যে জি-২০ সন্মিলন সম্পূৰ্ণ নোহোৱালৈকে এই কাৰ্য বন্ধ কৰি দিয়া হৈছিল। অহা ১০ দিনত বাল্য বিবাহৰ সৈতে জড়িত গোচৰত ২০০০ৰ পৰা ৩০০০ লোকক গ্ৰেপ্তাৰ কৰা হ’ব।
