নিউজ ব্যুৰ’,নগাঁও,২৯ছেপ্টেম্বৰ:–শ্ৰীমন্ত শংকৰদেৱ সংঘৰ অন্যতম প্ৰতিস্থাপক, পদাধিকাৰ,স্বাধীনতা সংগ্ৰামী তথা লোকসেৱক হলধৰ ভূঞাৰ ১৩২ সংখ্যক জন্মজয়ন্তী শুক্ৰবাৰে শ্ৰীমন্ত শংকৰদেৱ সংঘ কামপুৰ জিলা শাখাৰ উদ্যোগত পালন কৰা হয়। জন্মজয়ন্তী উপলক্ষে শুক্ৰবাৰে পুৱাৰে পৰা কামপুৰ জিলা শাখা নামঘৰত এক উৎসৱমুখৰ পৰিবেশে বিৰাজ কৰে । কামপুৰ অঞ্চলৰ চাৰিগৰাকী শংকৰীসাধকৰ স্মৃতিচাৰণ অনুস্থান অনুষ্ঠিত হয়। শ্ৰীমন্ত শংকৰদেৱ সংঘৰ প্ৰথমগৰাকী প্ৰতিস্থাপক, পদাধিকাৰ,লোকসেৱক হলধৰ ভূঞাৰ স্মৃতিচাৰণ কৰে ডাঃ স্বৰাজ মোহন বৰা আৰু পদাধিকাৰ লক্ষেশ্বৰ শইকীয়াৰ স্মৃতিচাৰণ কৰে কামপুৰ জিলা শাখাৰ সভাপতি মুনিন্দ্ৰ নাথ বৰাই । লগতে শ্ৰীমন্ত শংকৰদেৱ সংঘৰ প্ৰথমগৰাকী কেন্দ্ৰীয় সাংস্কৃতিক সম্পাদক লক্ষেশ্বৰ গোহাঁইৰ স্মৃতিচাৰণ কৰে অৱসৰপ্ৰাপ্ত শিক্ষক গজেন লস্কৰে আৰু আন এগৰাকী সাংস্কৃতিক সম্পাদক শংকৰী সাধক গোলাপ মহন্তৰ স্মৃতিচাৰণ কৰে অৱসৰপ্ৰাপ্ত শিক্ষক তুলসীমোহন বৰাই । কামপুৰ জিলা শাখাৰ সভাপতি মুনিন্দ্ৰ নাথ বৰাৰ সভাপতিত্বত অনুষ্ঠিত স্মৃতিচাৰণ সভাখনিত কামপুৰ জিলা শাখাৰ অন্তৰ্গত সোতৰগৰাকী বয়োজ্যেষ্ঠ ভকতক মানপত্ৰ আৰু গামোচাৰে সম্বৰ্ধনা জনাই শ্ৰদ্ধা জ্ঞাপন কৰা হয় । অনুষ্ঠানত শংকৰ সংঘৰ জিলা শাখাৰ প্ৰাক্তন সভাপতি ৰবিৰাম শইকীয়া,বিভূতি ভূষণ বৰঠাকুৰকে আদি কৰি বিশিষ্ট শংকৰী সাধকসকল উপস্থিত থাকে। ইফালে লোকসেৱক হলধৰ ভূঞাৰ জন্মগাঁও কামপুৰৰ তেঁতেলীসৰাতো লোকসেৱকৰ জন্মজয়ন্তী উৎসৱটি উদযাপন কৰা হয়। লোকসেৱকৰ জন্মগাঁৱত থকা প্ৰতিমূৰ্তিত বন্তি প্ৰজ্বলন কৰাৰ লগতে প্ৰতিঘৰৰ পদুলিত এগচিকৈ বন্তি প্ৰজ্বলন কৰি লোকসেৱকৰ প্ৰতি সন্মান জনোৱা হয় । ইফালে শুকুৰবাৰৰ পৰা তিনিদিনীয়া কাৰ্যসূচীৰে শ্ৰীমন্ত শংকৰদেৱ সংঘই কামপুৰৰ ঐতিহ্যমণ্ডিত কামপুৰ কেন্দ্ৰীয় নামঘৰত মহাপুৰুষ শ্ৰীমন্ত শংকৰদেৱৰ ৫৭৫ সংখ্যক আৰ্বিভাৱ মহোৎসৱটি কেন্দ্ৰীয়ভাৱে কামপুৰ জিলা শাখাৰ আতিথ্যত আৰু কামপুৰৰ ভক্তপ্ৰাণ ৰাইজৰ সহায়-সহযোগত আয়োজন কৰিছে । শ্ৰীমন্ত শংকৰদেৱৰ ৫৭৫ সংখ্যক আৰ্বিভাৱ মহোৎসৱৰ লগত সংগতি ৰাখি এখনি কেন্দ্ৰীয় নাট সমাৰোহৰো আয়োজন কৰিছে সংঘৰ কেন্দ্ৰীয় সমিতিয়ে । কামপুৰ জিলা শাখাৰ সহযোগত বিয়লি তিনি বজাত কামপুৰ কেন্দ্ৰীয় নামঘৰত নাট সমাৰোহৰ উদ্বোধনী সভাখন অনুষ্ঠিত হ’ব। শ্ৰীমন্ত শংকৰদেৱ সংঘৰ প্ৰধান সম্পাদক কুশল ঠাকুৰীয়াই উদ্বোধন কৰিবলগীয়া অনুষ্ঠানত উপস্থিত থাকিব শ্ৰীমন্ত শংকৰদেৱ সংঘৰ সাংস্কৃতিক বিভাগৰ সম্পাদক পৱিত্ৰ প্ৰাণ বৰা। এই নাট সমাৰোহত এঘাৰটা নাট্যদলৰ মাজত ঝুমুৰাৰ নাট প্ৰতিযোগিতা অনুস্থিত কৰাৰ লগতে মহাপুৰুষ জনাৰ দ্বাৰা ৰচিত দুখন অংকীয়া নাট প্ৰদৰ্শন কৰিব বুলি জনা গৈছে। অনুস্থানটোৰ তিনিদিনৰ কাৰ্যসূচীত সমূহ ৰাইজৰ উপস্থিতি আৰু সহায় সহযোগিতা কামনা কৰিছে আদৰণি সমিতিয়ে ।
ঋতু পৰ্ণ শৰ্মা,নগাঁও
