এটা অস্ত্ৰোপচাৰ আৰু এখন টাৱেলক লৈ দিল্লীত এতিয়া ব্যাপক চৰ্চা৷ এজন যুৱকৰ হাৰ্নিয়া অস্ত্ৰোপচাৰৰ সময়ত চিকিৎসকে যুৱকজনৰ পেটৰ পৰা আঁতৰ কৰে ৫০০ গ্ৰামৰ এখন টাৱেল৷
ৰাজধানী নগৰখনৰ এখন চিকিৎসালয়ত অস্ত্ৰোপচাৰৰ পাছত এজন যুৱকৰ পেটত ৰৈ গৈছিল ৫০০ গ্ৰাম ওজনৰ এখন টাৱেল৷ অস্ত্ৰোপচাৰৰ পাছত যেতিয়া তেওঁ পুনৰ বিষ অনুভৱ কৰিছিল, তেওঁক লোকনায়ক চিকিৎসালয়লৈ লৈ যোৱা হৈছিল, য’ত অস্ত্ৰোপচাৰৰ স্থানৰ পৰা ৫০০ গ্ৰাম ওজনৰ এখন টাৱেল উদ্ধাৰ কৰা হৈছিল৷
এতিয়া, বিবাদ নিষ্পত্তি আয়োগে ভুক্তভোগীৰ বাবে ৫ লাখ টকাৰ ক্ষতিপূৰণ নিৰ্ধাৰণ কৰিছে।
অস্ত্ৰোপচাৰ কৰাৰ সময়ত পেটত টাৱেল এৰি দিয়াৰ বাবে চিকিৎসকজনক দায়ী কৰি উত্তৰ-পূব জিলা বিবাদ নিষ্পত্তি আয়োগে ভুক্তভোগীৰ বাবে ৫ লাখ টকাৰ ক্ষতিপূৰণ নিৰ্ধাৰণ কৰিছে। লগতে একেটা ঘটনাৰ সৈতে সম্পৰ্কিত দিল্লী চিকিৎসা পৰিষদৰ প্ৰতিবেদনত দেখা গৈছে যে চিকিৎসকজনে পঞ্জীভুক্ত নোহোৱা এখন চিকিৎসালয়ত অস্ত্ৰোপচাৰ কৰিছিল।
ইয়াৰ পৰিপ্ৰেক্ষিতত আয়োগে চিকিৎসকক অভিযোগৰ তাৰিখৰ পৰা পৰিশোধ কৰালৈকে ছয় শতাংশ সূতৰ সৈতে ক্ষতিপূৰণৰ পৰিমাণ পৰিশোধ কৰিবলৈ নিৰ্দেশ দিছে। আদালতে ঔষধ, পৰামৰ্শ মাচুল আৰু পৰিবহন ব্যয়ৰ বাবে সূত হিচাপে ৫০,০০০ টকা আৰু আইনী ব্যয়ৰ বাবে ২৫,০০০ টকা পৰিশোধ কৰিবলৈও নিৰ্দেশ দিছিল।
