নিউজ ব্যুৰ’,নগাঁও,৩০অক্টোবৰ:–নগাঁও জিলাৰ বেবেজীয়াৰ সমীপৰ চমুৱাগাঁৱৰ হাতীচোং-জাজৰি পথত সংঘটিত সংঘটিত এক পথ দুৰ্ঘটনাত এগৰাকী ব্যৱসায়ী আহত হৈ মৃত্যুৰ বাতৰিয়ে অঞ্চলটোত শোকৰ ছাঁ পেলাইছে। চিকিৎসাধীন অৱস্থাত শেষ নিশ্বাস ত্যাগ কৰা ব্যৱসায়ীজন হৈছে উৎপল বৰ্মন। প্ৰাপ্ত বাতৰি মতে চমুৱাগাঁও তিনিআলিৰ এখন ষ্টেশ্যনাৰী দোকানৰ স্বত্বাধিকাৰী বৰ্মনে ৰবিবাৰে সন্ধিয়া ব্যৱসায় সামৰি পথৰ কাষেৰে খোজ কাঢ়ি থকা অৱস্থাতে এখন তীব্ৰ বেগত অহা দুচকীয়া বাহনে প্ৰচণ্ড জোৰেৰে খুন্দা মাৰে। ফলত গুৰুতৰভাৱে আঘাতপ্ৰাপ্ত হয় উৎপল বৰ্মন। পথ দুৰ্ঘটনাত আহত লোকজনক নিশাই নগাঁৱৰ এখন ব্যক্তিগত চিকিৎসালয়ত ভৰ্তি কৰোৱা হয় যদিও সোমবাৰে পুৱা ৯:৩০ বজাত লোকজনৰ মৃত্যু হয়। অঞ্চলটোত “মাষ্টৰ” নামেৰে স্থানীয়ভাৱে পৰিচিত ব্যৱসায়ীগৰাকীৰ মৃত্যুৰ খবৰ বিয়পি পৰাৰ লগে লগে শোকস্তব্ধ হৈ পৰে সমগ্ৰ চমুৱাগাঁও অঞ্চল। ৫৪ বছৰীয়া উৎপল বৰ্মনে মৃত্যুৰ সময়ত পত্নীৰ উপৰিও এগৰাকী কন্যাক ইহ সংসাৰত এৰি থৈ যায়। উৎপল বৰ্মনৰ মৃত্যুৰ প্ৰতি শ্ৰদ্ধা জ্ঞাপন কৰি চমুৱাগাঁও তিনিআলি ব্যৱসায়ী সন্থাই সোমবাৰে ব্যৱসায়িক কাম-কাজ বন্ধ ৰাখে। ইপিনে মৰণোত্তৰ পৰীক্ষাৰ অন্তত বিয়লি শোকাকুল পৰিৱেশত পথ দুৰ্ঘটনাত নিহত উৎপল বৰ্মনৰ শেষকৃত্য সম্পন্ন কৰা হয় । উল্লেখ্য যে,একাংশ উদণ্ড মটৰ চাইকেল -বাইক চালকৰ দৌৰাত্ম্যৰ বাবেই চলিত বৰ্ষটোত বৃহত্তৰ বেবেজীয়া অঞ্চলত কেইবাজনো লোকৰ প্ৰাণহানিৰ উপৰি আহতও হৈছে অঞ্চলটোৰ একাধিক লোক । ঋতু পৰ্ণ শৰ্মা,নগাঁও
