দৰঙৰ বানেকুছিত এক চাঞ্চল্যকৰ ঘটনা সংঘটিত হৈছে। ছিপাঝাৰৰ বানেকুছি গাঁৱৰ এজন লোকৰ শৌচাগাৰৰ টেংকিত অচিনাক্ত মহিলাৰ অৰ্ধগলিত মৃতদেহ উদ্ধাৰ কৰা হয়। বস্তাৰে মেৰিয়াই থোৱা অৱস্থাত মৃতদেহটো উদ্ধাৰ হৈছে।
জানিব পৰা মতে, গাঁওখনৰ কিশোৰ কলিতা নামৰ লোকৰ ঘৰৰ শৌচালয়ৰ টেংকিত অৰ্ধগলিত মহিলাৰ মৃতদেহ উদ্ধাৰ হৈছে। পৰিয়ালৰ লোকে শৌচালয়লৈ যোৱাত মৃতদেহটো প্ৰত্যক্ষ কৰে। এটা বস্তাৰ ভিতৰত যুৱতীৰ মৃতদেহটো উদ্ধাৰ হৈছে। ঘটনাস্থলীত পাথৰিঘাট আৰক্ষী উপস্থিত হৈ ঘটনাৰ তদন্ত আৰম্ভ কৰিছে।
মহিলাগৰাকীক ধর্ষণ কৰি হত্যা কৰা বুলি একাংশ স্থানীয় ৰাইজে সন্দেহ কৰিছে। অৱশ্যে, এই পৰ্যন্ত মৃত মহিলাগৰাকীৰ পৰিচয় চিনাক্ত হোৱা নাই। দৰং আৰক্ষীয়ে সমগ্ৰ ঘটনাৰ তদন্ত অব্যাহত ৰাখিছে। আৰক্ষীৰ তদন্তৰ পাছতহে ঘটনাৰ সকলো দিশ পোহৰলৈ আহিব। লগতে মৃত মহিলাগৰাকীৰ পৰিচয় উদ্ধাৰৰ লগতে কোনে আৰু কি কাৰণত হত্যা কৰিছে সেই কথা আৰক্ষীৰ তদন্তৰ অন্ততহে জানিব পৰা যাব।
