উল্লেখযোগ্য যে, মহানগৰীৰ ABCৰ Chee Glam নামৰ বিউটি ষ্টুডিঅ’ত কৰ্মৰত যুৱতীগৰাকী হত্যাৰ বলি হ’ল বুলি দাবী কৰে বহু সমন্ধীয় লোকে ৷ এবছৰৰ পূৰ্বে গুৱাহাটীলৈ আহিছিল এইগৰাকী অনুষ্কা শইকীয়া ৷ পুৱা বনকৰা মহিলা জুনু বৰাই মৃত অৱস্থাত প্ৰত্যক্ষ কৰিছিল অনুষ্কাক ৷ DCP আৰু ADCPয়ে নিজেই ঘটনাস্থলী পৰিদৰ্শন কৰি পৰীক্ষা কৰে সকলো দিশ ৷ কিয়নো এই ঘটনাক হত্যাকাণ্ড বুলি অভিযোগ উত্থাপন কৰিছে পৰিয়ালে ৷ লগতে মিচিং ছাত্ৰ সন্থায়ো পৰিকল্পিত হত্যাকাণ্ড বুলি অভিযোগ কৰিছে ঘটনাক ৷

পৰিয়ালৰ অভিযোগ অনুসৰি জুনু বৰাৰ সৈতে সম্পৰ্ক আছিল ভাড়াঘৰৰ মালিকৰ ৷ অভিযোগ মতে দুয়োৰে সম্পৰ্কৰ গোপন মুহূৰ্ত দেখা পাইছিল মৃত অনুষ্কা শইকীয়াই ৷ যাৰ বাবে অনুষ্কাৰ সৈতে সংঘাত হৈছিল ঘৰৰ মালিক আৰু জুনু বৰাৰ ৷ তেনে সময়তে অনুষ্কাৰ মৃত্যু হোৱা ঘটনাক সহজভাৱে লোৱা নাই পৰিয়ালৰ লোকে ৷ কিন্তু ইয়াৰ ভিতৰতো অনুষ্কাৰ মৃত্যুত আন এক দিশো পোহৰলৈ আহিছে ৷ সঘনাই ভাড়াঘৰলৈ আহিছিল অনুষ্কাৰ প্ৰেমিক। শনিবাৰে নিশাও অনুষ্কাৰ ভাড়াঘৰলৈ আহিছিল প্ৰেমিক জন। প্ৰেমিকৰ সৈতে সংঘাতো হৈছিল অনুষ্কাৰ। আৰক্ষীৰ প্ৰাথমিক তদন্তত পোহৰলৈ অহা এই বিষয়টোতো জোৰদাৰ তদন্ত আৰম্ভ কৰিছে ৷ কোন এই অনুষ্কাৰ প্ৰেমিক? শীঘ্ৰে দিছপুৰ আৰক্ষীয়ে আটক কৰি সোধা পোচা কৰিব অনুষ্কাৰ প্ৰেমিকক ৷ অনুষ্কাৰ মৃত্যৰ লগত জড়িত নেকি এই গৰাকী প্ৰেমিক? আৰক্ষীৰ অধিক তদন্তত পোহৰলৈ আহিব এই ৰহস্যজনক ঘটনাৰ প্ৰকৃত সত্য।

Source:https://assam.news18.com/