ভগৱান শ্ৰীৰামৰ অভিষেকৰ পূৰ্বে ৰামলালাৰ মূৰ্তিৰ প্ৰথম ছবিখন পোহৰলৈ আহিছে। এই ছবিখনত পদুম ফুলৰ ওপৰত ৰামলালাৰ মূৰ্তি বিৰাজ কৰা দেখা গৈছে। ৰামলালাৰ এই মূৰ্তিটো শ্ৰীৰামৰ ৫ বছৰীয়া শিশুৰ ৰূপ। অহা ২২ জানুৱাৰীত অযোধ্যাৰ ৰাম মন্দিৰত ৰামলালাৰ (Ramlala) অভিষেক কৰা হ’ব। ইয়াৰ বাবে প্ৰস্তুতি পূৰ্ণগতিত চলি আছে। বৃহস্পতিবাৰে শ্ৰীৰামৰ মূৰ্তি (Lord Rama) মন্দিৰৰ গৰ্ভগৃহত স্থাপন কৰা হয়। উল্লেখ্য যে, ৰামলালাৰ ৫১ ইঞ্চিৰ প্ৰতিমূৰ্তিটো মহীশূৰস্থিত ভাস্কৰ্য শিল্পী অৰুণ যোগীৰাজে নিৰ্মাণ কৰিছে।
মন কৰিবলগীয়া যে, ৰাম মন্দিৰ উদ্বোধনৰ পূৰ্বে ১৬ জানুৱাৰীৰ পৰা অযোধ্যাত বিভিন্ন ৰীতি-নীতিৰে ৰামলালাৰ প্ৰাণ প্ৰতিষ্ঠাৰ (Ramlala Pran Pratishtha) বিভিন্ন কাৰ্যসূচী আৰম্ভ কৰা হৈছে। ইয়াৰ পূৰ্বে ৰামলালাৰ মূৰ্তিটো মন্দিৰ চৌহদ ভ্ৰমণ কৰোৱা হৈছিল। সম্পূৰ্ণ ৰীতি-নীতিৰে মন্দিৰ চৌহদলৈ ভগৱান ৰামলালাৰ মূৰ্তি অনা হৈছিল। ২২ জানুৱাৰীত অযোধ্যাৰ ৰাম মন্দিৰত অনুষ্ঠিত হ’বলগীয়া অভিষেক অনুষ্ঠানৰ পূৰ্বে বৃহস্পতিবাৰে বিয়লি ৰাম মন্দিৰৰ গৰ্ভগৃহত ভগৱান শ্ৰীৰামৰ নতুন মূৰ্তি স্থাপন কৰা হয়।
অভিষেক অনুষ্ঠানৰ সৈতে জড়িত পূজাৰী অৰুণ দীক্ষিতে সংবাদ সংস্থা ভাষাক জনোৱা মতে, দুপৰীয়া বৈদিক জপৰ মাজতে ভগৱান ৰামৰ মূৰ্তি মন্দিৰৰ গৰ্ভগৃহত স্থাপন কৰা হয়। তেওঁ কয় যে ‘প্ৰধান সংকল্প’ ট্ৰাষ্টৰ সদস্য অনিল মিশ্ৰই কৰিছিল। তেওঁ কয় যে ইয়াৰ বাহিৰেও অন্যান্য অনুষ্ঠানৰ আয়োজন কৰা হৈছিল আৰু ব্ৰাহ্মণক কাপোৰ-কানিও দিয়া হৈছিল। শ্ৰীৰাম জন্মভূমি তীৰ্থ ক্ষেত্ৰ ট্ৰাষ্টে সামাজিক মাধ্যম ‘এক্স’ত এক পোষ্টযোগে এই তথ্য দিছিল। পোষ্টটোত কোৱা হৈছে যে ‘‘আজি দিনৰ ১২ বাজি ৩০ মিনিটৰ পিছত অযোধ্যাৰ জন্মভূমিত অৱস্থিত ৰাম মন্দিৰত ৰাম মূৰ্তি প্ৰৱেশ কৰে। দুপৰীয়া ১ বাজি ২০ বজাত গৃহস্থই ‘প্ৰধান সংকল্প’ দিওঁতে বেদ মন্ত্ৰৰ শব্দৰে পৰিৱেশ শুভ হৈ পৰিল। বৃহস্পতিবাৰে মূৰ্তিটোৰ জলধিৱাস পৰ্যন্ত কাৰ্যসূচীবোৰ সম্পূৰ্ণ কৰা হয়।’’
ইয়াৰোপৰি ট্ৰাষ্টে পোষ্টটোত কয় যে, ‘‘১৯ জানুৱাৰী, শুকুৰবাৰে পুৱা ৯ বজাত অৰণীমন্থনৰ পৰা জুইৰ সূত্ৰপাত ঘটিব। তাৰ আগতে শ্ৰীগণেশৰ দৰে স্থাপিত দেৱতাৰ পূজা, দুৱাৰ ৰখীয়াৰ দ্বাৰা বেদ পাঠ, দেৱপ্ৰবোধন, অনুসন্ধ্যাধিৱাস, কেশৰ-অধিৱাস, ঘ্ৰীতা-অধিৱাস, কুণ্ডপূজা, পঞ্চভুসংস্কাৰ আদি দেৱতাৰ পূজা কৰা হ’ব। লগতে যজ্ঞ অগ্নিকুণ্ড স্থাপন কৰা হ’ব।
