অযোধ্যাৰ ৰাম মন্দিৰ উদ্বোধনৰ বাবে মাজত মাথো কেইটামান দিন বাকী। ইয়াক লৈ বিশ্বৰ হিন্দু সমাজৰ লগতে সমগ্ৰ ভাৰতবৰ্ষতে উৎসুকতা বৃদ্ধি পাইছে। কিন্তু চাইবাৰ প্ৰৱঞ্চকে ইয়াৰ মাজতে গ্ৰহণ কৰিছে বিশেষ সুযোগ যাৰ বাবে সিহতে মেলিছে প্ৰৱঞ্চনাৰ এক ভয়ংকৰ জাল। চাইবাৰ অপৰাধীৰ এই জালত ভৰি দি আপোনাৰ অলপ অসাৱধানতাই কম সময়ৰ ভিতৰতে আপোনাৰ বেংক একাউণ্ট খালী কৰিব পাৰে।
অহা ২২ জানুৱাৰীত প্ৰধানমন্ত্ৰী নৰেন্দ্ৰ মোদীয়ে অযোধ্যাত ৰাম মন্দিৰ উদ্বোধন কৰিব। ইয়াৰ বাবে প্ৰস্তুতি পূৰ্ণ গতিত চলি আছে। এনে সময়ত বহুতে সেই বহুপ্ৰতীক্ষিত আটকধুনীয়া মন্দিৰটো চাবলৈ আহিব বিচাৰে। মুকলিৰ দিনা মন্দিৰত বিনামূলীয়াকৈ প্ৰৱেশৰ বাবে ভিআইপি পাছ লাভ কৰিব! এনে WhatsApp মেছেজ সকলোতে বিয়পি পৰিছে। এইটো আচলতে এটা প্ৰৱঞ্চনাৰ কৌশল।
প্ৰথম অৱস্থাত এটা APK (এণ্ড্ৰইড এপ্লিকেচন পেকেজ) ফাইল WhatsApp মেছেজ আহে – ‘Ram Janmabhoomi Grihsampark Abhiyan.APK’। তাৰ পিছত আন এটা বাৰ্তা আহে, য’ত কোৱা হৈছে, ‘ভিআইপি প্ৰৱেশ পাবলৈ ৰাম জন্মভূমি গৃহ সংৰক্ষণ অভিযান ইনষ্টল কৰক আৰু হিন্দুসকলৰ সৈতে শ্বেয়াৰ কৰক… জয় শ্ৰী ৰাম…’’
বিপদ ক’ত? ৰাজ্য বা কেন্দ্ৰীয় চৰকাৰ, অনুষ্ঠান আয়োজক বা মন্দিৰৰ ট্ৰাষ্ট এই উপৰোক্ত বাৰ্তা প্ৰেৰণত জড়িত নহয়। এয়া এক নতুন প্ৰৱঞ্চনা। এনে ক্ষতিকাৰক APK ফাইল ডাউনলোড কৰাটো আপোনাৰ বাবে বিপদজনক হ’ব পাৰে।
১. এনে ফাইলৰ দ্বাৰা আপোনাৰ ব্যক্তিগত তথ্য যেনে লগইন প্ৰমাণপত্ৰ, পাছৱৰ্ড, ক্ৰেডিট কাৰ্ড নম্বৰ, পৰিচয়, ব্ৰাউজিং ইতিহাস আৰু আনকি ব্যক্তিগত বাৰ্তাও লিক হ’ব পাৰে।
২. প্ৰৱঞ্চকে বেংকিং এপ হেক কৰি একাউণ্ট নম্বৰ, লেনদেনৰ তথ্য আৰু অ’টিপিৰ দৰে বিত্তীয় তথ্যও চুৰি কৰিব পাৰে।
৩. লগতে প্ৰৱঞ্চকে ডিভাইচৰ পৰা ব্যৱহাৰকাৰীৰ অৱস্থান অনুসৰণ কৰিব পাৰে আৰু সহজেই ব্যৱহাৰকাৰীৰ গতিবিধি নিৰীক্ষণ কৰিব পাৰে। কেৱল সেয়াই নহয়, এনে ভুৱা ফাইলে লক্ষ্য ডিভাইচত চোৰাংচোৱাগিৰি কৰিব পাৰে। তেনে ক্ষেত্ৰত টাইপিং, ব্ৰাউজিং, আনকি কেমেৰা আৰু মাইক্ৰ’ফোন ব্যৱহাৰ কৰিও গোপনে ব্যক্তিগত কাম-কাজ ৰেকৰ্ড কৰিব পাৰে। ইয়াৰোপৰিও মেলৱেৰে এপ ক্ৰেচ কৰিব পাৰে, ফোন ফ্ৰীজ কৰিব পাৰে, সকলো ডাটা স্থায়ীভাৱে নোহোৱা কৰিব পাৰে।
তৃতীয় পক্ষৰ APK চাওতে সাৱধান হওক। যদি আপুনি কোনো অচিনাকি প্ৰেৰকৰ পৰা এনে বাৰ্তা লাভ কৰে, তেন্তে সেই ব্যক্তিজনক ৰিপৰ্ট কৰি ব্লক কৰাটো ভাল হ’ব। প্ৰয়োজন হ’লে অভিযোগো দাখিল কৰিব পাৰে।
এনে লিংকত কোনো ধৰণে ক্লিক নকৰিব আৰু এই বাৰ্তা কাকো ফৰৱাৰ্ড নকৰিব। নিজেও সাৱধান হওক আৰু আনকো এনে প্ৰৱঞ্চনাৰ জালত পৰাৰ পৰা ৰক্ষা কৰক।
