এগৰাকী পিতৃৰ বাবে কন্যাৰ বিবাহ তেওঁৰ জীৱনৰ আটাইতকৈ ডাঙৰ ঘটনা। ভাৰতত কন্যা সন্তান জন্ম হোৱাৰ লগে লগে পিতৃয়ে সঞ্চয় কৰিবলৈ আৰম্ভ কৰে। প্ৰতিজন পিতৃয়ে নিজৰ কন্যাৰ বিবাহখন ধুমধামেৰে পাতি দিয়াৰ সপোন দেখে। আগতে মানুহে আত্মীয়ৰ যোগেদি বৈবাহিক সম্পৰ্ক ঠিক কৰিছিল। ইয়াৰ পিছত আহিল অনলাইন মেট্ৰিমনিয়েল ছাইটৰ যুগ, য’ত মানুহে নিজৰ পছন্দ অনুসৰি পাত্ৰ বা পাত্ৰীৰ সন্ধান লাভ কৰিব পাৰে। কিন্তু শেহতীয়াকৈ বিবাহৰ বাবে পাত্ৰ সন্ধান কৰাৰ এক নতুন পদ্ধতিৰ উন্মেষ ঘটিছে।
সময়ৰ লগে লগে মানুহৰ জীৱনত ছ’চিয়েল মিডিয়াৰ প্ৰভাৱ যথেষ্ট বৃদ্ধি পাইছে। বৰ্তমান সময়ত ছচিয়েল মিডিয়াত সকলো সক্ৰিয় হৈ থাকে। ইয়াৰ বাবেই এতিয়া ছ’চিয়েল মিডিয়াতো এচাম লোক সক্ৰিয় হৈ পৰিছে, যিয়ে পাত্ৰ-পাত্ৰীৰ বিবাহৰ বাবে উপযুক্ত সংগী বিচাৰিবলৈ আৰম্ভ কৰিছে। ইনষ্টাগ্ৰাম একাউণ্টতো একাংশ অবিবাহিত যুৱক-যুৱতীয়ে নিজৰ বাবে পাত্ৰ-পাত্ৰী বিচাৰি থকা দেখা যায়। তেনে এটা একাউণ্টতে এজন পিতৃয়ে নিজৰ কন্যাৰ বাবে পাত্ৰ বিচাৰিছে।
