ৰাষ্ট্ৰীয় পৰ্য্যায়ৰ ফুটবল ৰেফাৰীত স্থান পালে গোসাঁইগাঁৱৰ প্ৰেম নাৰ্জাৰী
ৰাষ্ট্ৰীয় পৰ্য্যায়ৰ ৰেফাৰীৰ শাৰীত এইবাৰ নিজৰ নাম অন্তৰ্ভুক্ত কৰিবলৈ সক্ষম হৈছে কোকৰাঝাৰ জিলাৰ গোসাঁইগাঁৱৰ প্ৰেম নাৰ্জাৰীয়ে ৷ সুদক্ষ ফুটবল খেলুৱৈ প্ৰেম নাৰ্জাৰীয়ে অসমৰ হৈ জুনিয়ৰ ৰাষ্ট্ৰীয় ফুটবল টুৰ্নামেণ্টত প্ৰতিনিধিত্ব কৰাৰ পিছত ২০১৬ চনৰ পৰা ফুটবল ৰেফাৰী হিচাপে নিজৰ কেৰিয়াৰ আৰম্ভ কৰে ৷ পৰবৰ্তী সময়ত অসম ফুটবল সন্থাৰ ৰেফাৰী বৰ্ডোৰ ক্লাছ’ ওৱান ৰেফাৰী শাৰীত থকা প্ৰেম নাৰ্জাৰীয়ে বৰদলৈ ট্ৰফীৰ উপৰি কেইবাখনো আগশাৰীৰ ফুটবল টুৰ্নামেণ্টত ৰেফাৰী হিচাপে নিজৰ পৰিচয় জিনিবলৈ সক্ষম হয় ৷ আনহাতে চৰকাৰী চাকৰীৰ অপেক্ষা নকৰি জীৱিকাৰ উৎস হিচাপে ই-ৰিস্কা চলায় পৰিয়ালটোক পোহপাল দি আহিছে নাৰ্জাৰীয়ে ৷ দৰিদ্ৰতা নেওচি নিজৰ লক্ষ্য স্থানত উপনিত হোৱাৰ অদম্য সাহস আৰু উৎসাহৰে নিজকে আজি সুখি অনুভৱ কৰিছে প্ৰেম নাৰ্জাৰীয়ে ৷
