সুস্থ হৈ থাকিবলৈ শৰীৰত বিভিন্ন ভিটামিনৰ প্ৰয়োজন হয়৷ তেনে এবিধ প্ৰয়োজনীয় ভিটামিন হৈছে ভিটামিন-ডি৷ এই ভিটামিন দেহৰ ভিতৰতে উৎপন্ন হয়৷ ভিটামিন-ডি শৰীৰৰ বাবে খুবেই অপৰিহাৰ্য৷ ভিটামিন-ডিৰ পৰ্যাপ্ত মাত্ৰাই দেহত কেলছিয়াম আৰু ফচফৰাছৰ শোষণ নিয়ন্ত্ৰণত সহায় কৰে৷ তদুপৰি ৰোগ প্ৰতিৰোধ ক্ষমতা উন্নত কৰে৷ একেদৰে হাড় আৰু দাঁতৰ স্বাভাৱিক বৃদ্ধি তথা বিকাশ সহজ কৰি তোলে ভিটামিন-ডিয়ে৷
বিশ্বজুৰি বিভিন্ন মহামাৰী সংক্ৰান্তীয় গৱেষণাতো কোৱা হৈছে যে হাড়ৰ স্বাস্থ্য অক্ষুণ্ণ ৰাখিবলৈ, চৰ্মজনিত ৰোগ আনকি কেন্সাৰৰ দৰে গুৰুতৰ বেমাৰ প্ৰতিৰোধ কৰাৰ ক্ষেত্ৰত ভিটামিন ডিয়ে কাম কৰে৷ শৰীৰৰ দুৰ্বল পেশীক সবল কৰাৰ ক্ষেত্ৰতো ভিটামিন-ডিৰ আৱশ্যক হয়৷ প্ৰাচীন কালত দেহত ভিটামিন-ডিৰ মাত্ৰা বঢ়াবলৈ সূৰ্যালোকত থকাৰ অভ্যাস কৰিছিল বহুতেই৷
শীত কালত দেহত ভিটামিন-ডি হ্ৰাস পায়৷ এনে সময়ত দেহত কেলছিয়ামৰ মাত্ৰা যথাযথ ৰখাৰ বাবে কমেও ১০ৰ পৰা ১৫ মিনিট সময় সূৰ্যালোকত থকা দৰকাৰ৷
◾ভিটামিন-ডিৰ আটাইতকৈ গুৰুত্বপূৰ্ণ ভূমিকাসমূহৰ ভিতৰত এটা হ’ল ই দেহত ৰোগ প্ৰতিৰোধ ক্ষমতা শক্তিশালী কৰি ভাইৰাছ আৰু বেক্টেৰিয়াৰ বিৰুদ্ধে যুঁজ দিবলৈ শক্তি দিয়ে৷
◾ভিটামিন-ডিৰ অভাৱ হোৱা নাৰীয়ে সহজে গৰ্ভধাৰণ কৰিব নোৱাৰে৷
◾হঠাৎ চুলি সৰাৰ প্ৰৱণতাই দেখা দিলে জানিব, আপোনাৰ ভিটামিন-ডিৰ অভাৱ ঘটিছে৷
◾হাড় আৰু পেশী দুৰ্বল হোৱা আৰু অস্থিসন্ধি বা পিঠিত বিষ অনুভৱ কৰাটো ভিটামিন-ডি হ্ৰাস পোৱাৰ লক্ষণ হ’ব পাৰে৷
◾ভিটামিন-ডিৰ মাত্ৰা কমিলে মানসিক চাপ বাঢ়ে, উদ্বেগ বৃদ্ধি পায় আৰু সঘনাই খং উঠে৷ তদুপৰি স্বাস্থ্যসন্মত খোৱাৰ পাছতো বা বিশ্ৰাম লোৱাৰ পাছতো অৱশ অথবা ক্লান্তি অনুভৱ কৰাটো ভিটামিন-ডি হ্ৰাস পোৱাৰ লক্ষণ হ’ব পাৰে৷
◾স্থূল ব্যক্তিসকলৰ ভিটামিন-ডি হ্ৰাস পোৱাৰ আশংকা বেছি৷ কিয়নো এনে লোকৰ মেদবহুল কোষ সমূহে দেহত ভিটামিন-ডিৰ নিঃসৰণত বাধাৰ সৃষ্টি কৰে৷
