দিল্লীৰ জুপৰীত মানুহ থাকিব নোৱাৰে, নৰকত বাস কৰে দিল্লীৰ আবাসীসকলে

অসমৰ মাটিত ৰাজ্যৰ বিজেপি চৰকাৰৰ বিৰুদ্ধে মুকলি প্ৰত্যাহ্বান দি গ’ল দিল্লীৰ মুখ্যমন্ত্ৰী অৰবিন্দ কেজৰিৱালে (Arvind Kejriwal)৷ ৰাজ্যৰ শিক্ষা, স্বাস্থ্যৰ পৰা কয়লা, চুপাৰীৰ ছিণ্ডিকেটক লৈ এটাৰ পাছত আনটো অভিযোগ অৰবিন্দ কেজৰিৱালৰ৷ পিছে, কেজৰিৱালৰ এই মন্তব্যৰ বিপৰীতে প্ৰতিক্ৰিয়া প্ৰকাশ কৰে ৰাজ্যৰ মুখ্যমন্ত্ৰী হিমন্ত বিশ্ব শৰ্মাই (Himanta Biswa Sarma)৷

হিমন্ত বিশ্ব শৰ্মাই কয়, ‘‘দিল্লী বিধানসভাত মোৰ বিৰুদ্ধে কাপুৰুষৰ দৰে বহু অভিযোগ আনিছিল কেজৰিৱালে৷ কিন্তু বিধানসভাৰ বাহিৰত এনে অভিযোগ আনিবলৈ আহ্বান জনাইছিলো৷ কিন্তু এনে কোনো অভিযোগ আনিবলৈ সক্ষম নহ’ল কেজৰিৱালে৷ বিপৰীতে মা কামাখ্যা আৰু ব্ৰহ্মপুত্ৰৰ সন্মুখত কেজৰিৱালে কৰি গ’ল কেতবোৰ মিছা প্ৰচাৰ৷’’

দিল্লীত ১২ লাখ চাকৰি দিয়াৰ কথা কৈছে কেজৰিৱালে৷ কিন্তু মুখ্যমন্ত্ৰী হিমন্ত বিশ্ব শৰ্মাই নিজে খবৰ লৈ গম পালে দিল্লীত সৰ্বমুঠ ডেৰ লাখ চাকৰি আছে৷ ১২ লাখ চাকৰি ক’ত ক’ত কেজৰিৱালে কেতিয়া দিলে তাৰ তথ্য বিচাৰিব মুখ্যমন্ত্ৰী শৰ্মাই৷ এইক্ষেত্ৰত দিল্লী চৰকাৰলৈ পত্ৰ লিখাৰ কথাও ক’লে মুখ্যমন্ত্ৰী শৰ্মাই৷

প্ৰশ্নকাকত ফাদিল বিষয়ত কেজৰিৱালৰ মন্তব্য প্ৰসংগতো উত্তৰ দিলে মুখ্যমন্ত্ৰী শৰ্মাই। ড০ শৰ্মাই কয়, চলিত বছৰত পঞ্জাবত দ্বাদশ শ্ৰেণীৰ ইংৰাজী প্ৰশ্নকাকত ফাদিলৰ বাবে সমগ্ৰ পৰীক্ষা বাতিল কৰিছিল৷ অসমত প্ৰশ্নকাকত কংগ্ৰেছে ফাদিল কৰিছে, সেয়া স্পষ্ট হৈছে বুলি মন্তব্য হিমন্ত বিশ্ব শৰ্মাৰ৷