জামুগুৰিহাট: চন্দন শৰ্মা: লকডাউনৰ মাজতে শোণিতপুৰ জিলাৰ ঢেকিয়াজুলিৰ বলুকা শিল্পী ৰঞ্জন শইকীয়াই স্ব-গৃহতে নিৰ্মাণ কৰিলে প্ৰকৃতিৰ বৈচিত্ৰ্যৰ সাক্ষী তথা পূৰ্ৱৰ আমাজন খ্যাত দিহিং পাটকাই অভয়াৰণ্যক বিষয়বস্তু হিচাবে লৈ এক অভিনৱ বলুকা আৰু চকমাটিৰ ভাস্কৰ্য ৷
দিহিং পাটকাইৰ গভীৰ অৰণ্য, অভয়াৰণ্যখনৰ মাজেৰে বৈ যোৱা নৈ, অশ্ৰুসিক্ত এটা প্ৰকাণ্ড হাতী শিল্পীগৰাকী সৃষ্ট বলুকা ভাস্কৰ্যত দৃষ্টিনন্দনকৈ নিৰ্মাণ কৰি দিহিং পাটকাই বৰ্ষাৰণ্যত জৈৱ-বৈচিত্ৰৰ প্ৰতি ভাবুকি সৃষ্টি কৰিব পৰা যিকোনো ধৰণৰ কাম-কাজৰ বিৰোধিতা কৰিছে ।
এই বলুকা শিল্পৰ যোগেদি সাম্প্ৰতিক সময়ত প্ৰতিগৰাকী প্ৰকৃতিপ্ৰেমীৰ মনৰ কথা চৰকাৰৰ দৃষ্টিগোচৰ কৰাৰ লগতে বিষয়টিৰ সঠিক সমাধানো আশা কৰিছে শিল্পী ৰঞ্জনে ৷
মই দিহিং পাটকাই, “The Amazon of the north east” শীৰ্ষক এই বলুকা শিল্পৰ জড়িয়তে অসম গৌৰৱ বৰ্ষাৰণ্যখনক ৰক্ষা কৰিবলৈ চৰকাৰক আহবান জনাইছে ৷
সেইদৰে তেওঁ নিৰ্মিত চকমাটিৰ শিল্পৰ মাধ্যমৰেও একে অনুৰোধ কৰি চৰকাৰে খনন কৰিব বুলি ওলোৱা বাতৰি সন্দৰ্ভত সৃষ্টি কৰিব বিচাৰিছে জন সচেতনতা ৷
