চণ্ডাল পৰ্য্যন্ত কৰি জগতৰ উপকাৰী
নাহি নাম গুণ বিনে আন ৷
সেহিসে কাৰণে হৰি নিজ যশ প্ৰিয় ভৈল
ভগৱন্ত ভকতৰ প্ৰাণ ৷৷
ব্ৰাহ্মণ, ক্ষত্ৰিয়, বৈশ্য, শূদ্ৰ, চাণ্ডাল পৰ্যন্ত পৰম মঙ্গলময় হৰিনাম গুণ শ্ৰৱণ কীৰ্ত্তন কৰি পৰম পবিত্ৰ হ’ব পাৰে ৷ হৰিনামে উচ্ছ-নীচ্, জাত পাত একো বিচাৰ নকৰি জগতৰ সকলোকে উপকাৰ কৰে অৰ্থাৎ অনাদি জন্মৰ সকলো পাপ নাশ কৰে ৷ সেইবাবে নিজ যশ প্ৰিয়, ভকতৰ মুখত নিজ নাম গুণ শুনি তেওঁ পৰম সন্তোষ পায় ৷ একান্ত ভকতে হৰি গুণ নামকে পৰম অমূল্য ধন বুলি কীৰ্ত্তন কৰে ৷ এনে ভকতৰ একমাত্ৰ হৰিয়ে প্ৰাণস্বৰূপ ৷
কীৰ্ত্তনত গুৰুজনে লিখিছে—
চণ্ডালো হৰিনাম লোৱে মাত্ৰ ৷
কৰিবে উচিত যজ্ঞৰ পাত্ৰ ৷৷
চাণ্ডালেও হৰিনাম কীৰ্ত্তন কৰি ব্ৰাহ্মনৰ দৰে কুলিন হব পাৰে ৷ যিদৰে-অগ্নিয়ে কেঁচা শুকান নিবিচাৰি সকলো পুৰি ধংস কৰে, সেইদৰে হৰিনামে জাতি অজাতি একো বিচাৰ নকৰি সকলোৰে পাপ নাশ কৰে ৷ ৷ কৃষ্ণ ৷ ৷
