সুস্থ থাকিবলৈ হ’লে দৈনিক তিনি সাজ খোৱাটো জৰুৰী৷ তিনি সাজৰ এসাজো যদি কেতিয়াবা নোখোৱাকৈ থাকে, তেন্তে স্বাস্থ্যত ইয়াৰ নেতিবাচক প্ৰভাৱ পৰে৷ বহুতে ওজন কমোৱাৰ বাবে ৰাতি নোখোৱাকৈ থাকে৷ তেওঁলোকৰ ধাৰণা, ৰাতি খালী পেটেৰে থাকি অতিৰিক্ত কেল’ৰি হ্ৰাস কৰিব পাৰি৷ কিন্তু এই ধাৰণা ভুল৷ ৰাতি খালী পেটেৰে শুলে বা নোখোৱাকৈ থাকিলে স্বাস্থ্যৰ ক্ষতি হয়৷ উল্লেখ কৰা হ’ল খালী পেটেৰে থাকিলে হ’ব পৰা ক্ষতি–
[১] যিসকলে ৰাতি নোখোৱাকৈ থাকে, তেওঁলোকৰ শাৰীৰিক আৰু মানসিক স্বাস্থ্যত ইয়াৰ প্ৰভাৱ পৰে৷ ফলত মানসিক অস্থিৰতাৰ সৃষ্টি হয়৷ মানসিক অস্থিৰতা বঢ়াৰ লগে লগে তেজত শৰ্কৰাৰ মাত্ৰা কমি আহে৷ সেইদৰে ষ্ট্ৰেছ হৰমনৰ পৰিমাণ বাঢ়ে৷ গতিকে কোনো কাৰণ নোহোৱাকৈ ৰাতি খালী পেটেৰে শোৱাৰ অভ্যাস নকৰিব৷
[২] অনিয়মীয়া খাদ্যাভ্যাস আৰু ৰাতি নোখোৱাকৈ শুলে অনিদ্ৰাত আক্ৰান্ত হোৱাৰ আশংকা বাঢ়ে৷ ইয়াৰ প্ৰভাৱ পৰে মানসিক স্বাস্থ্যত৷ তদুপৰি পুৱা বা নিশা নোখোৱাকৈ থাকিলে হতাশা বাঢ়ে৷ লগতে ষ্ট্ৰেছ হৰমনৰ প্ৰভাৱত নিদ্ৰাচক্ৰ বিঘ্নিত হয়৷
[৩] ৰাতি নোখোৱাকৈ শুলে পেটত ভোক থাকি যায়৷ ফলত খাদ্যৰ প্ৰতি ক্ৰমাৎ লোভ বাঢ়ে৷ পৰিণতিত জাংক ফুড খোৱাৰ প্ৰৱণতা বৃদ্ধি পায়৷ ইয়াৰ ফলত স্বাস্থ্যৰ ক্ষতি হয়৷ জাংক ফুড খালে দেহত অতিৰিক্ত কাৰ্বন, শৰ্কৰা আৰু কেল’ৰিৰ লগতে প্ৰৱেশ কৰা উপাদানসমূহে ৰোগ প্ৰতিৰোধ ক্ষমতা দুৰ্বল কৰি তোলে৷
[৪] ৰাতি নোখোৱাকৈ শুলে দীৰ্ঘ সময়ৰ বাবে যকৃত খালী হৈ থাকে৷ ইয়াৰ ফলত কৰ্মশক্তি কমিবলৈ আৰম্ভ কৰে৷ পৰিণতিত পিছদিনা শুই উঠাৰ পাছত ক্লান্তি বাঢ়ে৷
[৫] ডায়েবেটিছ ৰোগীসকলে নিশা খালী পেটে থকাটো অনুচিত৷ কিয়নো খালী পেটেৰে থাকিলে তেজত শৰ্কৰাৰ মাত্ৰা কমি আহে৷ ফলত ৰোগীৰ শাৰীৰিক অৱস্থা বেয়াৰ ফাললৈ ঢাল খায়৷ গতিকে ডায়েবেটিছৰ সমস্যা থাকিলে নিশা নোখোৱাকৈ নাথাকিব৷ লঘু আহাৰ হ’লেও খাইহে বিছনালৈ যাব৷
