আমাৰ দৈনন্দিন কার্যক্রমণিকাৰ অধিকাংশখিনি সমাপন হয় ঘৰ, স্কুল, অফিচ আদিৰ চাৰি বেৰৰ মাজত। অধিকাংশ সময়ত অহা-যোৱাও হয় ব্যক্তিগত বা যাত্রীবাহী বাহনত।
বিভিন্ন খাদ্যৰ উপৰি ভিটামিন ‘ডি’ৰ অন্যতম উৎস হ’ল সূৰ্যৰ পোহৰ বা ৰ’দ। ইয়াৰ উপকাৰিতা বহুমুখী। তেজত মিহলি হৈ থকা ভিটামিন ‘ডি’য়ে হাড় আৰু কোষৰ বৃদ্ধিত গুৰুত্বপূৰ্ণ ভূমিকা পালন কৰে। ত্বকৰ পোৰণি হ্রাসত সহায় কৰে।
শৰীৰত কেলছিয়াম আৰু ফছফেটৰ মাত্রা নিয়ন্ত্ৰণ কৰে। এতিয়া চাই লওক, ভিটামিন ‘ডি’ৰ অভাৱৰ ফলত আমাৰ শৰীৰত কি ধৰণৰ সমস্যাই দেখা দিব পাৰে—
অত্যধিক অৱসাদ
অতিশয় ব্যস্ত জীৱনত অৱসাদৰ শেষ নাথাকে। ৰ’দৰ অভাৱে সেই সমস্যা অধিক বৃদ্ধি কৰে।শেহতীয়া এক গৱেষণা অনুযায়ী, যি মানুহৰ শৰীৰত ভিটামিন ‘ডি’ৰ পৰিমাণ কম, তেওঁলোক অৱসাদত আক্রান্ত হোৱাৰ প্ৰৱণতা আনতকৈ দুগুণ। মস্তিষ্কৰ হিপ্পোকেম্পাছ সহ কিছু অংশই ভিটামিন ‘ডি’ৰ সহায়ত মন তজবজীয়া কৰি ৰখাত সহায় কৰে। যাৰ শৰীৰত ভিটামিন ‘ডি’ৰ পৰিমাণ কম, তেওঁলোকৰ মনত স্ফুর্তিও তুলনামূলকভাৱে কম।
কৰ্কটৰ স’তে যুদ্ধত শক্তি কমে
এক গৱেষণাত দেখা গৈছে যে যাৰ শৰীৰত ভিটামিন ‘ডি’ৰ মাত্ৰা বেছি, তেওঁলোকে কৰ্কট ৰোগৰ স’তে
বেছিকৈ যুদ্ধ কৰিব পাৰে। ভিটামিন ‘ডি’ ১০ শতাংশ বৃদ্ধি পালে,কৰ্কটৰ পৰা ৰক্ষা পৰাৰ সম্ভাৱনা চাৰি শতাংশ বাঢ়ি যায়। কিন্তু ভিটামিন ‘ডি’ৰ মাত্রা কমিলে, যুদ্ধ কৰাৰ শক্তিও শৰীৰে হেৰুৱাবলগীয়া হয়।
প্ৰষ্টেট কেন্সাৰ
প্রাপ্ত তথ্য অনুযায়ী শৰীৰত ভিটামিন ‘ডি’ৰ মাত্রা হ্রাস পালে বা অভাৱ ঘটিলে প্র’ষ্টেট কেন্সাৰৰ আশংকা চাৰি-পাঁচ গুণ বৃদ্ধি পায়।
ডিমেন্সিয়া আৰু এলজাইমাৰ্ছ
প্রাপ্তবয়স্কসকল যদি অত্যধিক পৰিমাণে ভিটামিন ‘ডি’ৰ অভাৱত ভোগে, তেন্তে তেওঁলোকৰ ডিমেন্সিয়া বা স্মৃতিভ্রংশ হোৱাৰ প্ৰৱণতা ৫৩ গুণ বৃদ্ধি পায়। ইয়াৰ লগতে থাকে এলজেইমাৰৰ ৰোগত আক্রান্ত হোৱাৰো বিপদ। ছ’ৰিয়াটিক আর্থ্রাইটিছ বাতৰ যন্ত্ৰণাৰ অন্তৰালতো থাকে ভিটামিন ‘ডি’ৰ অভাৱ। গৱেষণাত দেখা গৈছে, যি মানুহে ছ’ৰিয়াটিক আর্থ্রাইটিছত ভোগে, তেওংলোকৰ ৬২ শতাংশৰ শৰীৰতে নাই পর্যাপ্ত পৰিমাণৰ ভিটামিন ‘ডি’। হৃদৰোগ যাৰ শৰীৰত ভিটামিন ‘ডি’ কম, তেওঁলোক ‘ক’ৰোনাৰি আৰ্টাৰী ডিজিজ’ত আক্ৰান্ত হোৱাৰ প্ৰৱণতা ৩২ শতাংশ বেছি।
নিউমোনিয়া
ভিটামিন ‘ডি’ৰ অভাৱ ঘটিলে এজন মানুহ নিউমোনিয়াত আক্রান্ত হোৱাৰ প্ৰৱণতা আঢ়ৈ গুণ বেছি।
স্কিজোফ্রেনিয়া
চাইক্রিয়াটিক হেল্থৰ ক্ষেত্ৰত ভিটামিন ‘ডি’ৰ গুৰুত্ব অপৰিসীম। তেজত যদি ভিটামিন ‘ডি’ পর্যাপ্ত পৰিমাণে নাথাকে, তেন্তে স্কিজোফ্রেনিয়াৰ আশংকা বহুখিনি বৃদ্ধি পায়।
স্নায়ুৰ সমস্যা
পাৰ্কিন্সন্ছ, ক্ল’ৰ’ছিছৰ দৰে ৰোগত যিসকল আক্রান্ত, তেওঁলোকৰ শৰীৰত ভিটামিন ‘ডি’ৰ অভাৱে স্নায়ুৰ সমস্যা বৃদ্ধি কৰে।
অকাল মৃত্যু
ইমান পৰে দেখিলে যে ভিটামিন ‘ডি’ৰ অভাৱত কি নহ’ব পাৰে! ইয়াৰ অভাৱে নানা দিশৰ পৰা শৰীৰক অসাৰ কৰি পেলায়। যাৰ ফলত এজন মানুহৰ অকাল মৃত্যু পর্যন্ত ঘটিব পাৰে৷
এতিয়া নিশ্চয় গম পালে যে সূৰ্যৰ পোহৰ বা ৰ’দত লুকাই আছে ইমানবোৰ প্ৰতিকাৰ। তাৰ পাছতো বাৰু আপুনি সচেতন নহ’ব নেকি? গতিকে যিকোনো প্ৰকাৰে দিনটোত কমেও কিছু সময়ৰ বাবে হ’লেও শৰীৰত ৰ’দ লাগিবলৈ দিয়ক। ৰ’দৰ উত্তাপে গাৰ ছাল ক’লা কৰাৰ চিন্তা নকৰি পাৰিলে কেই মিনিটমানৰ বাবে হ’লেও খালী গাত সূৰ্যৰ পোহৰ লাগিবলৈ দিব।
