আইচিচি বিশ্বকাপ ২০২৩ৰ ২১তম খেলখন ভাৰত আৰু নিউজিলেণ্ডৰ মাজত আজি অনুষ্ঠিত হ’ব। দেওবাৰে বিশ্বকাপৰ সৰ্বশ্ৰেষ্ঠ দুয়োটা দলে নিজৰ পঞ্চমটো জয় লাভৰ বাবে ইতিমধ্যে সাজু হৈছে। এই খেলখন হিমাচল প্ৰদেশৰ ধৰমশালাত খেলা হ’ব।
ভাৰতে বিশ্বকাপত সুন্দৰ প্ৰদৰ্শন কৰিছে। দলটোৱে একেৰাহে ৪ খন মেচত জয় লাভ কৰিছে। এতিয়া টীম ইণ্ডিয়াই বিশ্বকাপৰ পইণ্ট তালিকাৰ শীৰ্ষত থকা নিউজিলেণ্ডৰ বিৰুদ্ধে খেলিবলৈ সাজু হৈছে।
যদি টীম ইণ্ডিয়াই আজিৰ মেচখনত বিজয়ী হয়, তেন্তে ই পইণ্ট তালিকাৰ এক নম্বৰত আহিব। নিউজিলেণ্ডৰ দলটোৱে বিশ্বকাপত এতিয়ালৈকে খেলা চাৰিখন খেলৰ ভিতৰত আটাইকেইখনতে জয় লাভ কৰিছে আৰু উন্নত ৰাণ ৰেটৰ বাবে পইণ্ট তালিকাৰ শীৰ্ষত আছে।
অৱশ্যে, বৰষুণে এই গুৰুত্বপূৰ্ণ খেলখন ব্যাহত কৰিব পাৰে। একুৱেদাৰৰ প্ৰতিবেদন অনুসৰি, খেলখনৰ সময়ত বৰষুণ হোৱাৰ সম্ভাৱনা আছে। অঞ্চলটোত গোটেই দিনটো আকাশ ডাৱৰীয়া হৈ থাকিব আৰু বহু বেছি পৰিমাণে ঠাণ্ডা পৰাৰো আশংকা আছে। ধৰমশালাত তাপমাত্ৰা প্ৰায় ১২-১৩ ডিগ্ৰী চেলচিয়াছ হ’ব পাৰে।
যিহেতু ভাৰতে এতিয়ালৈকে খেলা সকলোবোৰ মেচ গৰম ঠাইত খেলিছে, গতিকে বতৰৰ আকস্মিক পৰিৱৰ্তনৰ বাবে তেওঁলোকে সমস্যাৰ সন্মুখীন হ’ব লগাত পৰিব পাৰে। অৱশ্যে, বতৰৰ পৰিৱৰ্তনে নিউজিলেণ্ডৰ বাবে সমস্যাৰ সৃষ্টি নকৰিব, কাৰণ ধৰ্মশালাৰ জলবায়ু নিউজিলেণ্ডৰ দৰেই হোৱা বাবে কিৱি দলটো এনে ঠাণ্ডা বতৰত খেলিবলৈ অভ্যস্ত।
হিমাচল প্ৰদেশ ক্ৰিকেট সংস্থাৰ বিষয়াসকলে বৰষুণ পৰিহাৰ কৰিবলৈ খেলখনৰ আগতে ধৰমশালাৰ এটা মন্দিৰত প্ৰাৰ্থনাৰ আয়োজন কৰে। ধৰ্মশালাৰ ‘ইন্দ্ৰু নাগ’ মন্দিৰত পূজা সম্পূৰ্ণ কৰা হৈছে। এই পূজাত IPLৰ অধ্যক্ষ অৰুণ ধুমলও উপস্থিত আছিল।
ইণ্ডিয়ান এক্সপ্ৰেছৰ মতে, IPLৰ অধ্যক্ষ অৰুণ ধুমলে কৈছে যে যিকোনো ডাঙৰ অনুষ্ঠানৰ আগতে ষ্টেডিয়ামত উপাসনা কৰা হ’ব। বিশ্বকাপৰ প্ৰথম খন খেলৰ আগতে একে ঘটনা ঘটিছিল। দেওবাৰে ভাৰত বনাম নিউজিলেণ্ডৰ খেলৰ বাবে ইন্দ্ৰু নাগ মন্দিৰত পুনৰ প্ৰাৰ্থনা কৰা হয়। বৰষুণে খেলখন যাতে ব্যাহত নকৰে, সেই উদ্দেশ্যৰে এই পূজাটো কৰা হৈছিল। ইন্দ্ৰু নাগ মন্দিৰ ধৰমশালাৰ পৰা ৪ কিলোমিটাৰ দূৰত এটা পাহাৰত অৱস্থিত।
