শেহতীয়াকৈ, অল ইণ্ডিয়া ইনষ্টিটিউট অৱ মেডিকেল চাইন্সেছৰ (এইমছ) নিউৰোলজী বিভাগৰ গৱেষকসকলে এক তথ্য প্ৰকাশ কৰিছে।
এইমছে জনাইছে , ভাৰতত প্ৰতি চাৰি মিনিটত কমেও এজন লোকৰ ষ্ট্ৰোকত মৃত্যু হয়। হৃদৰোগজনিত সমস্যা বৰ্তমান বিদ্যুতৰ গতিত বৃদ্ধি পাইছে।
বহুতো লোক হৃদৰোগজনিত সমস্যাত ভুগিছে । যুৱ প্ৰজন্মৰ মাজতো এই ৰোগ দেখিবলৈ পোৱা হৈছে । ক্ৰমশ হৃদৰোগৰ আশংকা বৃদ্ধি পাইছে ।
পৰিসংখ্যাই দেখুৱাইছে যে দেশত প্ৰতি বছৰে হোৱা বেছিভাগ মৃত্যু ষ্ট্ৰোকৰ ফলত হয়। ভাৰতত প্ৰতি বছৰে প্ৰায় ১,৮৫,০০০ টা ঘটনা ষ্ট্ৰোকৰ হয়। প্ৰতি ৪০ ছেকেণ্ডত এটা ষ্ট্ৰোক হয়।
‘গ্লোবেল বাৰ্ডেন অফ ডিজিছৰ’ অনুসৰি, ভাৰতত ষ্ট্ৰোকৰ হাৰ ৬৮.৬ শতাংশ। ষ্ট্ৰোকৰ ফলত মৃত্যুৰ হাৰ ৭০.৯ শতাংশ আৰু ৭৭.৭ শতাংশই ষ্ট্ৰোকৰ ফলত পক্ষাঘাতগ্ৰস্ত হৈ কাম কৰাৰ ক্ষমতা হেৰুৱাইছে।
বহুলোকে অনুমান কৰে যে বয়স বৃদ্ধি হোৱাৰ লগে লগেই এই ধৰণৰ ৰোগ সাধাৰণতে হয়। চিকিৎসকসকলে জনাইছে , তাতেই অধিকাংশই ভুল কৰে ।
অসুস্থতাই কোনো বয়স নামানে । কম বয়সতে ষ্ট্ৰোক হ’ব পাৰে। আনকি ২০ বছৰৰ তলৰ লোকসকলৰ মাজতো, ষ্ট্ৰোকৰ আশংকা থাকে। কিছুমান দৈনন্দিন জীৱনৰ অভ্যাসে ষ্ট্ৰোকৰ আশংকা বৃদ্ধি কৰিব পাৰে। সেইসমূহ জানিলে এতিয়াৰ পৰা সতৰ্ক হ’ব পাৰে।
অস্বাস্থ্যকৰ খাদ্য খোৱা
স্বাস্থ্যকৰ আহাৰে ষ্ট্ৰোকৰ আশংকা ৮০ শতাংশ হ্ৰাস কৰিব পাৰে। অতিৰিক্ত নিমখ, চেনী আৰু চৰ্বি থকা খাদ্যই ষ্ট্ৰোকৰ আশংকা বৃদ্ধি কৰে। অনিয়ন্ত্ৰিত ৰক্তচাপ আৰু কলেষ্টেৰলে ডাঙৰ বিপদ আনিব পাৰে। যিসকল ইতিমধ্যে বিপদাশংকাত আছে তেওঁলোকে কণীৰ কুহুম আৰু মাংস খোৱা বন্ধ কৰিব লাগিব পাৰে।
পৰিশ্ৰম কম কৰা
শৰীৰচৰ্চাৰ অভাৱ আৰু গোটেই দিনটো শুই থকাই মাতি আনে এই ৰোগ । এলেহুৱা জীৱনযাপনে ওজন বৃদ্ধি কৰে, পেশী আৰু হাড়ৰ ক্ষমতা হ্ৰাস কৰে। বিপাকৰ হাৰৰ ওপৰতো ইয়াৰ নেতিবাচক প্ৰভাৱ পৰে।
ধূমপান
ধূমপানৰ ফলত, বহুতো ক্ষতিকাৰক পদাৰ্থ শৰীৰত প্ৰৱেশ কৰে। আনকি পৰোক্ষ ধূমপানেও শৰীৰৰ গুৰুতৰ ক্ষতি কৰে। তেজত অক্সিজেনৰ স্তৰ হ্ৰাস হয়। ফলস্বৰূপে, হাঁওফাঁওৰ স’তে, সংবহন প্ৰণালীৰো ক্ষতি হয়।
সুৰাপান কৰা
অত্যাধিক সুৰাপান হৈছে অনিয়ন্ত্ৰিত ৰক্তচাপৰ অন্যতম কাৰণ। সুৰাই শিৰা আৰু ধমনীবোৰৰ স্থিতিস্থাপকতাক গুৰুতৰভাৱে প্ৰভাৱিত কৰিব পাৰে। এইটো ষ্ট্ৰোকৰ এটা মুখ্য কাৰণ।
