নিউজ ব্যুৰ’,নগাঁও,২৮এপ্ৰিল:–নগাঁও জিলাৰ কলিয়াবৰৰ জখলাবন্ধাত শনিবাৰে নিশা এক চাঞ্চল্যকৰ ঘটনা সংঘটিত হয় । নিশা দুৰ্বৃত্তই এখন চলিত নৈশ বাছলৈ শিলগুটি নিক্ষেপ কৰাৰ ফলত ভংয়কৰ দুৰ্ঘটনাৰ পৰা ৰক্ষা পৰে নৈশ বাছখন। দুৰ্বৃত্তৰ এই ঘটনাৰ বাবে আতংকিত হৈ পৰে নৈশ বাছখনৰ যাত্ৰীসকল। প্ৰাপ্ত বাতৰি মতে শনিবাৰে নিশা প্ৰায় ডেৰ বজাত এ এছ ০১ কিউ চি ৮৮৩৭ নম্বৰৰ “ত্ৰিশূল ট্ৰেভেলছ” নামৰ বাছখনলৈ দুৰ্বৃত্তই শিলগুটি নিক্ষেপ কৰে । যোৰহাটৰ পৰা গুৱাহাটী অভিমুখী বাছখন লৈ লক্ষ্য কৰি জখলাবন্ধাৰ আচিনা সত্ৰৰ সমীপত শিলগুটি নিক্ষেপ কৰে দুৰ্বৃত্তই। উল্লেখ্য যে তিনি উদণ্ড যুৱকে এই কাণ্ড সংঘটিত কৰি পলায়ন কৰে বুলি প্ৰকাশ কৰিছে বাছখনৰ চালকে। দুৰ্বৃত্তৰ শিলগুটি নিক্ষেপত এটি শিশুসহ তিনিজনকৈ যাত্ৰী আহত হয়। পাছত ঘটনাস্থলীত জখলাবন্ধা আৰক্ষী উপস্থিত হৈ তদন্ত আৰম্ভ কৰে।
ঋতু পৰ্ণ শৰ্মা,নগাঁও
