শ্ৰমিক সকলৰ অধিকাৰ, প্ৰাপ্য, ন্যায় বিভিন্ন সময়ত এইবোৰ খৰ্ব কৰা পৰিলক্ষিত হয় | প্ৰাপ্য মজুৰিৰ পৰা বিভিন্ন সময়ত শ্ৰমিক সকল বঞ্চিত হ’বলগীয়া হয় | বছৰৰ এটা দিন অৰ্থাৎ ১ মে’ তাৰিখে যেন শ্ৰমিক সকলৰ পক্ষ্যত মাত মাতিবলৈ মন্ত্ৰী-বিধায়ক সকলে মঞ্চত উদ্দান্ত ভাষণ প্ৰদান কৰে |
আজি অসমৰ বিভিন্ন প্ৰান্তৰ লগতে ওদালগুৰি জিলাৰ ঔৰাংগাজুলি চাহ বাগিচাত অসম চাহ মজদুৰ সংঘ,মংগলদৈ শাখাৰ উদ্যোগত উদযাপন কৰা হয় শ্ৰমিক দিৱস | অনুষ্ঠানত মূখ্য অতিথি ৰূপে উপস্থিত থাকে বিধানসভাৰ অধ্যক্ষ বিশ্বজিৎ দৈমাৰী লগতে প্ৰাক্তন কেন্দ্ৰীয় ডনাৰ’ মন্ত্ৰী তথা অসম চাহ মজদুৰ সংঘৰ সভাপতি পৱন সিং ঘাটোৱাৰ | বাগিচা সমূহত কাম কৰা শ্ৰমিক সকলৰ উপস্থিতিত নিজৰ ভাষণ প্ৰদান কৰি বিধানসভাৰ অধ্যক্ষ গৰাকীয়ে কয় যে, শ্ৰমিক সকলক বিভিন্ন সময়ত শোষণ কৰা হয় | ৮ ঘন্টাৰ সলনি ১২ ঘন্টা কাম কৰিবলৈ দিয়া হয় |
এইবোৰ অনিয়ম সোনকালে বন্ধ কৰা হ’ব | আনহাতে চাহ শ্ৰমিক সকলৰ দৈনিক মজুৰি ৩৫১ কৰাক লৈ চৰকাৰে চিন্তা-চৰ্চা কৰি থকা বুলি কয় প্ৰাক্তন মন্ত্ৰী পৱন সিং ঘাটোৱাৰে | যি সময়ত ৰাজ্যত মূল্যবৃদ্ধিয়ে সাধাৰণ ৰাইজৰ মূৰত মাধমাৰ সোছাইছে ,সেই সময়ত বিধানসভাৰ অধ্যক্ষ গৰাকীয়ে মূল্যবৃদ্ধিৰ সম্পৰ্কে গাঁ এৰা মন্তব্য আগবঢ়াই | মিঠাতেল দাম বৃদ্ধিৰ ক্ষেত্ৰত তেওঁ কয় যে, কোম্পানী সমূহে কিহৰ বাবে মিঠাতেলৰ দাম বৃদ্ধি কৰিছে সুধিব লাগিব | এইদৰে আচলতে চৰকাৰক মূল্যবৃদ্ধিৰ ক্ষেত্ৰত সমৰ্থন জনোৱা পৰিলক্ষিত হয় |
