আন্তঃৰাষ্ট্ৰীয় এমি বঁটা লাভ কৰা প্ৰথমগৰাকী ভাৰতীয় প্ৰযোজক হিচাপে পৰিগণিত হ’ব একতা কাপুৰ
মনোৰঞ্জন জগতৰ অন্যতম শ্ৰেষ্ঠ টেলিভিছন আৰু চলচ্চিত্ৰ প্ৰযোজক একতা কাপুৰ । বালাজী টেলিফিল্মছ নামেৰে একতাৰ নিজা প্ৰডাকচন হাউচ আছে, যিটো 1994 চনত প্ৰতিষ্ঠা হৈছিল ।
একতাই ‘নাগিন’, ‘কিউংকি সাছ ভি কভি বহু থি’, ‘কুমকুম ভাগ্য’, ‘কচটি জিন্দেগী কি’ আৰু ‘বড়ে আচ্ছে লগতে হ্যায়’ আদি জনপ্ৰিয় টেলিভিছন শ্ব’ৰ জৰিয়তে জনপ্ৰিয়তা অৰ্জন কৰিছিল ৷ শেহতীয়াকৈ তেওঁ শোভা কাপুৰৰ সৈতে আয়ুষ্মান খুৰানা আৰু অনন্যা পাণ্ডেৰ অভিনীত ‘ড্ৰিম গাৰ্ল ২’ ছবিখন প্ৰযোজনা কৰিছে। ইয়াৰ উপৰিও তেওঁ ‘ৱান্স আপন এ টাইম ইন মুম্বাই’, ‘এক ভিলেইন’, ‘ৰাগিনী এম এম এছ’, ‘দ্য ডাৰ্টি পিকচাৰ’ আদি ছবিও নিৰ্মাণ কৰিছে।
মনোৰঞ্জন উদ্যোগত কৰা উজ্জ্বল কামৰ বাবে তেওঁক আন্তঃৰাষ্ট্ৰীয় এমি বঁটাৰে সন্মানিত কৰা হ’ব । এইখিনিতে উল্লেখ কৰিব লাগিব যে এই বঁটা লাভ কৰা প্ৰথমগৰাকী ভাৰতীয় প্ৰযোজক হ’ব একতা । এই কৃতিত্বৰ ওপৰত একতাই ছ’চিয়েল মিডিয়াত শ্বেয়াৰ কৰিছে হৃদয়স্পৰ্শী টোকা । একতাই লিখিছে, ‘এই সন্মান লাভ কৰাৰ পিচত মই নম্ৰতা আৰু উৎসাহেৰে ভৰি পৰিছোঁ । এই বঁটাটোৱে মোৰ হৃদয়ত এক বিশেষ স্থান দখল কৰিছে, সমগ্ৰ বিশ্বতে মোৰ দেশক প্ৰতিনিধিত্ব কৰাটো এক সন্মান । বিশেষকৈ নাৰীৰ বাবে কাহিনী সৃষ্টি কৰা এগৰাকী নাৰী হিচাপে টেলিভিছন মোৰ বাবে আত্ম-আৱিষ্কাৰৰ দৰে হৈ আহিছে ।’
তেওঁ লগতে কয়, ‘এই সন্মানে মোক বিশ্বৰ মঞ্চত থিয় দিবলৈ অধিক শক্তিশালী কৰি তুলিছে । 2023 চনৰ আন্তঃৰাষ্ট্ৰীয় এমি সঞ্চালকালয় বঁটাৰ বাবে ধন্যবাদ ।’
