চিআইএছএফ দলৰ সৰ্বমুঠ ৬৪টা পদক
জেভলিনত সোণৰ পদক লাভ উমাৰ
পলাশবাৰী, ২০ জুলাই :চিআইএছএফৰ হেড কনিষ্টবল উমা চৌধাৰীয়ে আন্তঃৰাষ্ট্ৰীয় পৰ্যায়ত সুন্দৰ প্ৰদৰ্শন দেখুৱাই ৰাজ্যখনলৈ সন্মান কঢ়িয়াই আনিছে। বাৰ্মিংহামত অনুষ্ঠিত বিশ্ব পুলিচ এণ্ড ফায়াৰ গেমছ ২০২৫ত জেভেলিন নিক্ষেপ প্ৰতিযোগিতাত উমাই স্বৰ্ণ পদক লাভ কৰে। তেওঁৰ এই সাফল্যৰ বাবে কেন্দ্ৰীয় ঔদ্যোগিক নিৰাপত্তা বাহিনী (চিআইএছএফ) আৰু ৰাজ্য দুয়োটাতে সুখৰ পৰিৱেশ বিৰাজ কৰিছে। উমা বৰ্তমান চিআইএছএফৰ হেড কনিষ্টবল হিচাপে কাম কৰি আছে। মন কৰিবলগীয়া যে ৩০ জুনৰ পৰা ৬ জুলাইলৈ বাৰ্মিংহামত অনুষ্ঠিত হৈছিল বিশ্ব আৰক্ষী আৰু অগ্নিনিৰ্বাপক বাহিনীৰ খেল ২০২৫। ইয়াত ৭০খন দেশৰ দহ হাজাৰৰো অধিক খেলুৱৈয়ে বিভিন্ন খেলত অংশগ্ৰহণ কৰিছিল। চি আই এছ এফৰ দলটোৱেও সুন্দৰ প্ৰদৰ্শন দেখুৱাই সৰ্বমুঠ ৬৪টা পদক লাভ কৰে।
