18.2 C
Assam
Tuesday, November 29, 2022

Featured News

নগাঁৱৰ জামুগুৰি দঘাট চুবুৰীৰ ২৪০ বছৰীয়া নামঘৰৰ প্ৰতিষ্ঠা দিৱস

নগাঁৱৰ জামুগুৰি দঘাট চুবুৰীৰ ২৪০ বছৰীয়া নামঘৰৰ প্ৰতিষ্ঠা দিৱস

15-year-old government vehicles will be scrapped: Nitin Gadkari

Union minister Nitin Gadkari today (November 25)...

কেঁচা পনীৰ খালে হয় এই চাৰিটা লাভ, নিয়ন্ত্ৰণত থাকে ওজন!

পনীৰ ভাৰতীয়সকলৰ প্ৰিয় ব্যঞ্জনবোৰৰ ভিতৰত অন্যতম। পনীৰ...

পাচনতন্ত্র শক্তিশালী কৰাৰ আয়ুর্বেদিক উপায়

Assamese Newsপাচনতন্ত্র শক্তিশালী কৰাৰ আয়ুর্বেদিক উপায়

আয়ুর্বেদ অনুসৰি পাচন সম্বন্ধীয় সমস্যা হৈছে প্রায়ভাগ ৰোগৰ মূল কাৰণ৷ পাচনতন্ত্র শক্তিশালী হ’লে অধিকসংখ্যক ৰোগ প্রতিৰোধ কৰাৰ লগতে নিৰাময় কৰিব পাৰি৷ আয়ুর্বেদত পাচনতন্ত্র সবল কৰি ৰাখিবলৈ কেতবোৰ নিয়মাৱলী উল্লেখ কৰিছে৷ সেইসমূহ হৈছে–
ৰাতিপুৱা শুই উঠি পানী সেৱন কৰাঃ ৰাতিপুৱা শুই উঠিয়ে এগিলাচ পানী খোৱাৰ অভ্যাসে পাচন সম্বন্ধীয় বহুতো সমস্যা দূৰ কৰে৷ শুই উঠি পানী খালে ক্ষুদ্রান্তৰ কার্যক্ষমতা বঢ়াৰ ফলত আমাৰ শৰীৰৰ অলাগতিয়াল দ্রব্য নিষ্কাশন হোৱাত সহায় কৰে৷
সঠিক দিনচর্যা পালন কৰাঃ সঠিক দিনচর্যা পালন কৰাটো আমাৰ শৰীৰৰ বাবে অতি আৱশ্যক৷ পুৱা শুই উঠাৰ পৰা ৰাতি শুৱালৈকে সঠিক দিনচর্যা মানি চলা উচিত৷ সদায় সঠিক সময়ত ভোজন কৰা উচিত৷ পুৱাৰ আহাৰৰ পৰা আৰম্ভ কৰি ৰাতিৰ আহাৰলৈকে সদায় একে সময়ত খাব লাগে৷ আমাৰ শৰীৰটোৱে আমি পালন কৰা দিনচর্যা অনুসৰি নিজকে খাপ খুৱাই লয়৷ গতিকে সদায় সঠিক সময়ত খোৱাৰ লগতে একে সময়ত শোৱা উচিত৷ বহুসংখ্যক লোকে কামৰ তাগিদাত ৰাতি দেৰিলৈকে থাকে আৰু পুৱাও দেৰিকৈ শুই উঠে৷ ৰাতি দেৰিলৈকে জাগি থকাৰ ফলত পাচনতন্ত্রৰ ওপৰত বিৰূপ প্রভাৱ পৰে৷ সেয়ে ৰাতি সোনকালে শুবলৈ যোৱাৰ অভ্যাস কৰিব লাগে৷
পর্যাপ্ত টোপনিঃ টোপনিৰ লগত আমাৰ শৰীৰটোৰ ওতপ্রোত সম্বন্ধ আছে৷ খাদ্যৰ লগতে টোপনিও আমাৰ শৰীৰটোৰ বাবে অতি আৱশ্যক৷ বহুতে ভাবে যে কমকৈ টোপনি যোৱাৰ পিছতো তেওঁ নিজকে ফিট ৰাখিছে৷ কিন্তু এয়া ভুল ধাৰণা৷ অলপ দিনৰ বাবে ঠিকে থাকিলেও পিছলৈ ইয়ে আপোনাৰ স্বাস্থ্যৰ অৱনতি ঘটাব৷ সেয়েহে দিনে কমেও ৮ ঘণ্টা ভাল টোপনি যোৱা অতি আৱশ্যক৷
সতেজ আহাৰ গ্রহণ কৰকঃ আয়ুর্বেদ অনুসৰি খোৱা খাদ্য ভালদৰে হজম হোৱাৰ অন্যতম নীতি হৈছে সতেজ আহাৰ গ্রহণ কৰা৷ গৰম আৰু সতেজকৈ তৈয়াৰ কৰা খাদ্যই এনজাইমৰ কার্যক্ষমতা বঢ়াই তোলে৷
ভোক লাগিলেহে খাদ্য খোৱা উচিতঃ বহু লোকে যেতিয়া ভোক লাগে তেতিয়া একো নাখায় আৰু যেতিয়া ভোক নাথাকে কিবা নহয় কিবা খাই থকা দেখা যায়৷ যিটো স্বাস্থ্যৰ বাবে অতি ক্ষতিকাৰক৷ সেয়ে আয়ুর্বেদত ভোক লাগিলেহে খোৱাৰ কথা উল্লেখ কৰিছে৷ অত্যধিক খাদ্য সেৱন কৰাৰ ফলত পাচনতন্ত্রত অধিক চাপ পাৰে৷
খাদ্য ভালদৰে চোবাই খাওকঃ খাদ্য কেতিয়াও খৰধৰকৈ খোৱা অনুচিত৷ লাহে–ধীৰে ভালদৰে চোবাই খাব লাগে৷ এনেদৰে খালে পাকস্থলীত ভালদৰে খাদ্য হজম হোৱাত সহায় হয়৷ আহাৰ যিমানে চোবাই খাব, সিমানে আমাৰ শৰীৰে পোষক তত্ত্বসমূহ লাভ কৰিব৷
পানী খোৱাৰ নিয়মঃ আয়ুর্বেদৰ মতে খাদ্য খোৱাৰ আগতে বেছিকৈ পানী খোৱা অনুচিত৷ আহাৰ খোৱাৰ আগতে আৰু খাই থাকোঁতে অত্যধিক পানী খালে পাচন ক্রিয়া কমি যায়৷ সেয়ে আয়ুর্বেদত আহাৰ খোৱাৰ আধা ঘণ্টা পিছত ভালদৰে পানী খোৱাৰ কথা কৈছে৷ পানী সদায় কুহুমীয়া গৰম কৰি খাব লাগে৷ ঠাণ্ডা পানী বিশেষকৈ ফ্রীজৰ পানী স্বাস্থ্যৰ বাবে ক্ষতিকাৰক৷
আটাইকেইবিধ ৰস খাদ্য তালিকাত অন্তর্ভুক্ত কৰকঃ সুষম খাদ্যৰ বাবে গোটেই ছয় প্রকাৰৰ ৰস খাদ্য তালিকাত অন্তর্ভুক্ত থকাটো অতি জৰুৰী৷ এই ছয়বিধ ৰস যেনে– মধুৰ, অম্ল, লৱণ, কটু, তিক্ত আৰু কষায়ে আমাৰ শৰীৰত দোষৰ সমতা বজাই ৰাখে৷
নিশাৰ আমাৰ খোৱাৰ পিছত খোজকঢ়াঃ আয়ুর্বেদ অনুসৰি নিশাৰ আহাৰ খোৱাৰ পিছত কমেও ১০০ খোজ কাঢ়িবলৈ উপদেশ দিছে৷ ইয়াৰ ফলত খাদ্য ভালদৰে হজম হয় আৰু তেজত ছুগাৰৰ পৰিমাণ সাম্য অৱস্থাত থাকে৷
আহাৰ খোৱাৰ পিছত বজ্রাসন কৰকঃ বজ্রাসন এনে এবিধ আসন, যাক আহাৰ খোৱাৰ পিছত কৰিবলৈ নির্দেশ দিয়া হৈছে৷ বজ্রাসন কৰাৰ ফলত পাচনতন্ত্রৰ অংগসমূহলৈ তেজ চলাচল হোৱাৰ ফলত পাচনতন্ত্রৰ কার্যক্ষমতা বৃদ্ধি পায়৷
শাৰীৰিক কার্য কৰকঃ যিসকল লোকে কোনো ধৰণৰ শাৰীৰিক কার্য নকৰে, তেওঁলোকৰ পাচনতন্ত্র অতি কম সময়তে ৰুগীয়া হ’বলৈ ধৰে৷ যদিহে অফিচত কোনো ধৰণৰ শাৰীৰিক কাম নাথাকে, তেন্তে পুৱা শুই উঠি খৰকৈ খোজকঢ়া, চাইক্লিং ইত্যাদি কৰিব পাৰে৷
অনবৰত বহি নাথাকিবঃ অনবৰত বহি থাকিলে খোৱা খাদ্য ভালদৰে হজম নহয়৷ যিসকল লোকে অনবৰত কম্পিউটাৰত বহি কাম কৰিব লগা হয়, তেওঁলোকে মাজে মাজে ব্রেক লৈ খোজকঢ়া উচিত৷
অত্যধিক চর্বি আৰু তেলজাতীয় খাদ্য বর্জন কৰাঃ আমাৰ বয়স যিমানে বাঢ়ি যায় সিমানে তেলজাতীয় খাদ্য হজম কৰাৰ ক্ষমতা কমি যায়৷ অত্যধিক চর্বি, তেলজাতীয় আৰু ফাষ্টফুড খোৱাৰ ফলত বজহজম, বমি, টেঙা উগাৰ ইত্যাদি হ’বলৈ ধৰে৷ চর্বিযুক্ত খাদ্যই আমাৰ পাচন ক্রিয়াৰ কার্যক্ষমতা কমাই দিয়ে৷ যাৰ ফলত খাদ্য হজম হোৱাত পলম হয়৷
মদ, চিগাৰেটৰ পৰা দূৰত থাককঃ মদ আৰু চিগাৰেট সেৱনৰ ফলত আমাৰ পাচনতন্ত্র বেয়া হোৱাৰ উপৰি বিভিন্ন বেমাৰে বেৰি ধৰে৷ চাহ, কফী ইত্যাদিও পৰাপক্ষত কমাই খোৱা উচিত৷
পাচনশক্তি বঢ়াবলৈ কেইবিধমান বিশেষ খাদ্য তলত উল্লেখ কৰা হৈছে–
ইলাচিঃ ইলাচি গর্ভৱতী মহিলাৰ বাবে অতি লাভকাৰী৷ ইলাচিয়ে গর্ভৱতী মহিলাৰ পাচন সম্বন্ধীয় সমস্যা দূৰ কৰে৷ চাহৰ লগতো ইলাচি ব্যৱহাৰ কৰিব পাৰে৷
নেমুঃ নেমু আমাৰ স্বাস্থ্যৰ বাবে অতি উপকাৰী৷ নেমু খোৱাৰ ফলত পেটৰ বহুতো সমস্যা, বদহজম, গেছ ইত্যাদি দূৰ হয়৷
মধুৰিআমঃ মধুৰিআম এবিধ অতি উৎকৃষ্ট ফল৷ মধুৰিআমত ভিটামিন–চি, ফছফৰাছ, পটাছিয়াম আদি থাকে৷ মধুৰিআম খোৱাৰ ফলত মস্তিষ্ক, হূদযন্ত্র আৰু পাচনতন্ত্র মজবুত হয়৷
চফঃ এচিডিটি, বুকু জ্বলা–পোৰা, খোৱা খাদ্য ভালদৰে হজম হ’বলৈ চফ খাওক৷ নিতৌ এচামুচকৈ চফ খালে পাচনতন্ত্র ঠিকে থাকে৷
হালধিঃ হালধিয়ে আমাৰ বদহজম, পেটৰ আলচাৰ, পাচন সম্বন্ধীয় সমস্যা আদি দূৰ কৰে৷
আমলখিঃ আমলখিয়ে আমাৰ শৰীৰত ‘ভিটামিন–চি’ৰ অভাৱ দূৰ কৰে৷ আমলখি নিতৌ খোৱাৰ ফলত আমাৰ পাচনতন্ত্র ৰুগীয়া হোৱাৰ পৰা ৰক্ষা পৰে৷ আমলখি পিচি তাৰ লগত জালুক, হিং, জিৰা মিহলায়ো খাব পাৰে৷
কেঁচা অমিতা স্বাস্থ্যৰ বাবে অতি উপকাৰী৷ অমিতাত পেপেইন নামৰ এবিধ এনজাইম থাকে, যিয়ে খোৱা খাদ্যত থকা প্র’টিন বিভাজিত কৰি পাচনযোগ্য কৰি তোলে৷
কলঃ কল পেটৰ বাবে এবিধ উৎকৃষ্ট ফল৷ কল সেৱনৰ ফলত পাচন শক্তি বাঢ়ে৷
চালাদঃ খাদ্য ভালদৰে হজম হ’বলৈ চালাদ খাওক৷
চালাদত নেমু, বিলাহী, পিঁয়াজ আদিও অন্তর্ভুক্ত কৰিব পাৰে৷
ইয়াৰ উপৰি মুগ, গজালি ওলোৱা বুট, আম, ডালিম, কমলা ইত্যাদি খোৱা উচিত৷
পাচন শক্তি বঢ়াবলৈ কেইটামান ঘৰুৱা দিহা–
দৈ পাচন ক্রিয়াৰ বাবে অতি উত্তম৷ সেয়েহে দৈ সেৱন কৰক৷
আজৱাইন পানীৰ লগত উতলাই খালে পাচনতন্ত্র ঠিকে থাকে৷
আনাৰসৰ ৰস পাচনতন্ত্রৰ বাবে অতি উত্তম৷
নেমুত ক’লা নিমখ মিহলাই খালে বদহজম দূৰ হয়৷
হিং ব্যৱহাৰ কৰক৷ ইয়াৰ ফলত বদহজম আৰু গেছ দূৰ হয়৷
২–৩ গ্রাম শুকান আদাৰ গুড়ি কুহুমীয়া গৰম পানীৰ লগত খাওক৷
এচামুচ ভজা জিৰা গুড়ি এগিলাচ পানীৰ লগত মিলাই খাওক৷
সমান পৰিমাণৰ আদাৰ ৰস আৰু নেমুৰ ৰসৰ লগত এচিকুট নিমখ মিলাই আহাৰ খোৱাৰ আগত গ্রহণ কৰক৷
গেছ দূৰ কৰিবলৈ কেঁচা নহৰু খাওক৷

Check out our other content

Check out other tags:

Most Popular Articles

error: Content is protected !!
%d bloggers like this: