সুস্বাস্থ্যৰ বাবে প্ৰতিদিনে পৰ্যাপ্ত নিদ্ৰাৰ প্ৰয়োজন, কম টোপনিয়ে সৃষ্টি কৰিব পাৰে এই ৫টা গুৰুতৰ ৰোগ

1 min read

টোপনি আৰু স্বাস্থ্যৰ মাজত প্ৰত্যক্ষ সম্পৰ্ক আছে। সুস্থ হৈ থাকিবলৈ প্ৰতিদিনে ৭ৰ পৰা ৮ ঘণ্টা ভালকৈ টোপনি অহাটো অতি প্ৰয়োজনীয়। পৰ্যাপ্ত পৰিমাণে টোপনি গ’লে আপুনি গোটেই দিনটো সতেজ আৰু শক্তিশালী অনুভৱ কৰে। টোপনিৰ অভাৱৰ ফলত শাৰীৰিক আৰু মানসিক স্বাস্থ্যৰ ওপৰত বেয়া প্ৰভাৱ পৰে। কম টোপনিৰ বাবে গুৰুতৰ ৰোগৰ সম্ভাৱনা বহুগুণে বৃদ্ধি পায়। দীৰ্ঘদিন ধৰি টোপনিৰ ক্ষেত্ৰত বিসংগতি হোৱাতো মাৰাত্মক প্ৰমাণিত হ’ব পাৰে। শুনিলে নিশ্চয় স্তম্ভিত হ’ব, কিন্তু এই কথাটো সম্পূৰ্ণ শুদ্ধ। টোপনি সুস্বাস্থ্যৰ চাবিকাঠি বুলি ধৰিব পাৰি।

টোপনি মানুহৰ মৌলিক প্ৰয়োজন। যিদৰে প্ৰতিদিনে খোৱা-বোৱা আৰু উশাহ-নিশাহ লোৱাটো গুৰুত্বপূৰ্ণ, ঠিক তেনেদৰে প্ৰতিদিনে পৰ্যাপ্ত পৰিমাণৰ টোপনি সুস্বাস্থ্য আৰু সুস্থতাৰ বাবে গুৰুত্বপূৰ্ণ। চেণ্টাৰ ফৰ ডিজিজ কণ্ট্ৰল এণ্ড প্ৰিভেনচন (CDC)ৰ পৰিসংখ্যা অনুসৰি আমেৰিকাৰ প্ৰায় ৩৩% প্ৰাপ্তবয়স্ক লোকে প্ৰতিদিনে পৰ্যাপ্ত টোপনি নাপায়। এক সমীক্ষা অনুসৰি আমেৰিকাত প্ৰায় ৫ৰ পৰা ৭ কোটি লোক টোপনিৰ লগত জড়িত সমস্যাত ভুগি আছে। টোপনিৰ অভাৱত শাৰীৰিক আৰু মানসিক স্বাস্থ্যজনিত সমস্যাৰ সৃষ্টি হয়। ইয়াৰ ফলত অকাল মৃত্যুৰ সম্ভাৱনা বৃদ্ধি পায়। ইয়াৰ কাৰণে বহুতো গুৰুতৰ ৰোগৰ আশংকাও উদ্ভৱ হয়।

নেচনেল হাৰ্ট, লাং এণ্ড ব্লাড ইনষ্টিটিউট (NHLBI)ৰ প্ৰতিবেদন অনুসৰি টোপনিৰ অভাৱত হৃদৰোগৰ সম্ভাৱনা বৃদ্ধি পায়। টোপনি নোপোৱাৰ ফলত হৃদযন্ত্ৰৰ স্বাস্থ্যৰ ওপৰত বেয়া প্ৰভাৱ পৰে আৰু দীৰ্ঘদিন তেনে কৰিলে হৃদৰোগ হ’ব পাৰে।

আপুনি জানি আচৰিত হ’ব যে টোপনিৰ অভাৱৰ প্ৰভাৱ বৃক্কতো বেয়া। ইয়াৰ ফলত বৃক্কৰ কাম-কাজত প্ৰভাৱ পৰে। বৃক্ক সুস্থ কৰি ৰাখিবলৈ প্ৰতিদিনে ৭ৰ পৰা ৮ ঘণ্টা টোপনি লোৱা উচিত।

প্ৰতিদিনে পৰ্যাপ্ত পৰিমাণে টোপনি নোপোৱাৰ বাবে মানুহৰ উচ্চ ৰক্তচাপৰ সমস্যা হ’ব পাৰে। ৰক্তচাপ বজাই ৰখাৰ বাবে টোপনি অতি গুৰুত্বপূৰ্ণ বুলি গণ্য কৰা হয়। উচ্চ ৰক্তচাপৰ বাবে হৃদযন্ত্ৰৰ ধমনীবোৰৰ ক্ষতি হোৱাৰ আশংকা থাকে।

টোপনিৰ সমস্যাই মেদবহুলতা, মধুমেহ আদি ৰোগৰ সৃষ্টি কৰিব পাৰে। মেদবহুলতা নিজেই বহু ৰোগৰ বাবে দায়ী। যদি আপুনি মধুমেহ ৰোগী তেন্তে টোপনিৰ লগত একেবাৰেই আপোচ নকৰিব, নহ’লে পৰিস্থিতি গুৰুতৰ হ’ব পাৰে।

টোপনি আৰু মানসিক স্বাস্থ্যৰ মাজত প্ৰত্যক্ষ সম্পৰ্ক আছে। টোপনিৰ অভাৱত মানসিক চাপ, উদ্বেগ, হতাশাকে ধৰি বহুতো মানসিক ৰোগ হ’ব পাৰে। কেৱল এয়াই নহয়, ই ষ্ট্ৰোকৰ সম্ভাৱনাও বৃদ্ধি কৰে। বহুতো স্নায়ুজনিত বিকাৰ সমস্যা হ’ব পাৰে।

You May Also Like

More From Author