16.1 C
Assam
Wednesday, December 7, 2022

Featured News

কটন চৌহদৰ পথত হ’ব ষ্ট্রীটফুড বজাৰ

Assamese Newsকটন চৌহদৰ পথত হ’ব ষ্ট্রীটফুড বজাৰ

স্মার্টচিটীৰ ৰূপ পাবলৈ গৈ থকা গুৱাহাটী মহানগৰীত ষ্ট্রীটফুড লেন গঢ়াৰ পৰিকল্পনা হাতত লৈছে গুৱাহাটী পৌৰ নিগমে৷ মুম্বাইৰ খাও গলিৰ দৰেই গুৱাহাটীৰ পথটোত সু–শৃংখলিত আৰু প্রণালীবদ্ধ ৰূপত পদপথ ব্যৱসায়ীসকলক সংস্থাপিত কৰাৰ লক্ষ্যৰে এই পৰিকল্পনা কৰা হৈছে বুলি পৌৰ আয়ুক্ত দেৱাশিস শর্মাই জানিবলৈ দিছে৷ গুৱাহাটী মহানগৰীৰ নির্বাচিত এলেকাবোৰ বাণিজ্যিক কেন্দ্র আৰু ষ্ট্রীটফুড লেনলৈ ৰূপান্তৰ কৰাৰ বাবে পৌৰ নিগমে চিন্তাচর্চা কৰিছে৷

পৌৰ আয়ুক্ত দেৱাশিস শর্মাই জানিবলৈ দিয়া মতে, পাণবজাৰৰ কটন বিশ্ববিদ্যালয় চৌহদ এলেকাক প্রথম পর্যায়ত মুম্বাইৰ খাও গলিৰ দৰে ষ্ট্রীটফুড লেন হিচাপে গঢ়ি তোলাৰ পৰিকল্পনা কৰা হৈছে৷ ইতিমধ্যে এই সন্দর্ভত সদৌ অসম পদপথ ব্যৱসায়ী সন্থাৰে পৌৰ নিগম কর্তৃপক্ষই আলোচনাত মিলিত হৈছে৷ পাণবজাৰত হ’ব লগা এই ষ্ট্রীটফুড লেন সন্দর্ভত গুৱাহাটীবাসীৰ মতামত গ্রহণ কৰিহে পৌৰ নিগমে সিদ্ধান্ত ল’ব বুলি পৌৰ আয়ুক্তগৰাকীয়ে জানিবলৈ দিছে৷ এই ষ্ট্রীটফুড লেনত ২০গৰাকী পদপথ ব্যৱসায়ীক পুনৰ সংস্থাপিত কৰা হ’ব৷

গুৱাহাটী পৌৰ নিগমৰ পঞ্জীয়নভুক্ত পদপথ ব্যৱসায়ীসকলেহে এই সুবিধা লাভ কৰিব৷ অতিকমেও পাঁচ বছৰ পদপথত ব্যৱসায় কৰি অহা পৌৰ নিগমৰ পঞ্জীয়নভুক্ত পদপথ ব্যৱসায়ীয়ে ইয়াৰ বাবে আবেদন কৰিব পাৰিব৷ পদপথত পৰিষ্কাৰ–পৰিচ্ছন্ন পৰিৱেশত আৰু বিজ্ঞানসন্মতভাৱে মহানগৰবাসীক থলুৱা, পৰম্পৰাগত খাদ্যৰ লগতে চাইনীজ আৰু পশ্চিমীয়া সু–স্বাদু খাদ্য বিক্রী কৰি অহা ব্যৱসায়ীকহে অগ্রাধিকাৰ দিয়া হ’ব৷ স্বচ্ছ আৰু নিকা পদ্ধতিৰে সর্বসন্মতিক্রমে ষ্ট্রীটফুড লেনত ২০গৰাকী ব্যৱসায়ীক পুনৰ সংস্থাপিত কৰা হ’ব৷ এই ব্যৱসায়ীসকলক জি পি এছৰ জৰিয়তে ট্রেক কৰা হ’ব৷ অনুমতিপ্রাপ্ত ব্যৱসায়ীয়েহে পাণবজাৰৰ ষ্ট্রীটফুড লেনত ব্যৱসায় কৰিব পাৰিব৷ ৰাইজৰ মতামত আৰু ব্যৱসায়ীসকলৰ সৈতে কৰা আলোচনাৰ অন্তত ছমাহৰ ভিতৰত পাণবজাৰ কটন বিশ্ববিদ্যালয় চৌহদত ষ্ট্রীটফুড লেন হৈ উঠাৰ সম্ভাৱনা আছে৷

Check out our other content

Check out other tags:

Most Popular Articles

error: Content is protected !!
%d bloggers like this: