দেশত ডিজিটেল পৰিশোধৰ প্ৰৱণতা দ্ৰুতগতিত বৃদ্ধি পাবলৈ ধৰিছে আৰু সেয়ে এতিয়া বেছি সংখ্যক লোকে হাতত ধন ৰখাটো পছন্দ নকৰে। কিন্তু তথাপিও কোনো সময়ত নগদ ধনৰ প্ৰয়োজন হয়। নগদ ধন উলিয়াবৰ বাবে মানুহে ATM ব্যৱহাৰ কৰে। যদিও ATMত লেনদেন অতি সুবিধাজনক, কিন্তু কেতিয়াবা ই আপোনাক সমস্যাত পেলাব পাৰে। ATMৰ পৰা কোনো ঠগ-প্ৰৱঞ্চকসকলে প্ৰতাৰণা কৰাৰ বিভিন্ন ঘটনা দেখিবলৈ পোৱা যায়, গতিকে ATMৰ পৰা ধন উলাওতে সতৰ্ক হোৱাৰ যথেষ্ট প্ৰয়োজন আছে।
ইয়াৰোপৰি, ATMৰ পৰা টকা উলিওৱাৰ সময়ত বহুবাৰ নগদ ধন ওলাই নাহে, কিন্তু একাউণ্টৰ পৰা আপোনাৰ ধন কৰ্তন হোৱাৰ বাৰ্তা কেংকৰ পৰা লাভ কৰে। যদি কেতিয়াবা আপোনাৰ সৈতে এনেকুৱা কিবা ঘটে, তেন্তে চিন্তা কৰাৰ কোনো প্ৰয়োজন নাই। ইয়াত কিছুমান পদ্ধতি উল্লেখ কৰা হৈছে যিবোৰ ব্যৱহাৰ কৰি আপুনি কেইদিনমানৰ ভিতৰত আপোনাৰ কৰ্তন কৰা ধনৰ পৰিমাণ ঘূৰাই পাব পাৰিব।
SMSৰ জৰিয়তে তথ্য লাভ
কেতিয়াবা কাৰিকৰী সমস্যাৰ বাবে ATMৰ পৰা ধন ওলাই নাহে। ATMএ আপোনাৰ লেনদেন প্ৰত্যাখ্যান কৰে, তথাপিও আপুনি এটা SMS লাভ কৰে যে পৰিমাণটো আপোনাৰ একাউণ্টৰ পৰা কৰ্তন কৰা হৈছে। এনে পৰিস্থিতিত উদ্বেগ বৃদ্ধি পায়। অৱশ্যে, যদি আপোনাৰ টকা কৰ্তন বেংকে কৰে, তেন্তে ই স্বয়ংক্ৰিয়ভাৱে আপোনাৰ একাউণ্টত জমা হয়। কিন্তু, কেতিয়াবা প্ৰৱঞ্চনাৰ ফলতো এনে হ’ব পাৰে, য’ত প্ৰৱঞ্চকসকলে ATMৰ সৈতে খেলিমেলি কৰে আৰু ইয়াক আপোনাৰ কাৰ্ড ‘ক্লোন’ কৰিবলৈ ব্যৱহাৰ কৰে আৰু পিছত আপোনাৰ একাউণ্টৰ পৰা নগদ ধন উলিয়াব পৰা যায়।
এনে পৰিস্থিতিত, প্ৰথমে বেংকৰ গ্ৰাহক সেৱাৰ সৈতে যোগাযোগ কৰিব লাগিব। ইয়াৰ বাবে, আপুনি বেংকৰ ২৪ ঘণ্টাৰ গ্ৰাহক সেৱা হেল্পলাইন নম্বৰত ফোন কৰিব। বেংকে আপোনাৰ সমস্যা শুনিব আৰু আপোনাৰ লেনদেনৰ প্ৰসংগ নম্বৰ ৰেকৰ্ড কৰাৰ পিছত কাৰ্যবাহীয়ে আপোনাৰ অভিযোগ দাখিল কৰিব। তেওঁলোকে আপোনাক এটা অভিযোগ ট্ৰেকিং নম্বৰ জাৰি কৰিব। ভাৰতীয় ৰিজাৰ্ভ বেংকৰ (RBI) মতে, এই পৰিস্থিতিত ৭টা কৰ্মদিনৰ (7 working days) ভিতৰত গ্ৰাহকৰ একাউণ্টত জমা দিব লাগে।
ক্ষতিপূৰণৰ ব্যৱস্থা
যদি বেংকে নিৰ্ধাৰিত সময়ৰ ভিতৰত আপোনাৰ একাউণ্টৰ পৰা ডেবিট কৰা পৰিমাণ ঘূৰাই নিদিয়ে, তেন্তে ক্ষতিপূৰণৰ ব্যৱস্থাও আছে। ভাৰতীয় ৰিজাৰ্ভ বেংকৰ নিয়ম অনুসৰি, অভিযোগৰ ৫ দিনৰ ভিতৰত বেংকে অভিযোগটো সমাধান কৰিব লাগে। যদি বেংকে এই সময়ছোৱাত সমস্যাটো সমাধান নকৰে, তেন্তে প্ৰতিদিনে ১০০টকা হাৰত ক্ষতিপূৰণ পৰিশোধ কৰিব লাগিব। ইয়াৰোপৰি, আপুনি https://cms.rbi.org.inত অভিযোগ দাখিল কৰিব পাৰিব।
